Қаржылық сауат

Банк картасындағы ақшаны қалай қауіпсіз сақтауға болады?

13.06.2021

1 мин

12

9803

Қазіргі кезде азаматтар арасында қолма-қол төлемге қарағанда банк карталары арқылы жасалатын қаржылық операциялар жиі кездеседі. Сол себепті картаңыздағы қаражатты сақтауға байланысты маңызды ережелерді қатаң ұстанған абзал. Dauletten.kz сайты банк карталарындағы қаражатты қауіпсіз сақтауға арналған бірқатар маңызды қағидаларды назарларыңызға ұсынады.

• Әлеуметтік желілерде банк картасының суретін жарияламаңыз. Картаның алдыңғы жағында сіздің жеке мәліметтеріңіз жазылса, артқы бетінде ешкімге көрсетуге болмайтын CVV код болады. Сондай-ақ, картаның суретін ұялы телефонда сақтамаған дұрыс.
• Интернет арқылы онлайн сауда жасау үшін арнайы виртуалды карта немесе дебеттік картаны тегін ашуға болады. Виртуалды карта – арнайы интернетте төлем жасау үшін ашылатын карталардың бірі.
• Картаға 3D Secure code орнатыңыз.
• Өзге жандарға, тіпті банк қызметкерлеріне CVV мен PIN-кодты хабарламаңыз.
•  Интернет банкинг үшін күрделі құпиясөз ойластырып, төлемді SMS код арқылы растау қызметін таңдаңыз.
• Интернет дүкендер мен түрлі сатылым сайттарына банк картасын тіркеуге болмайды. Бұл жағдайда қаншалықты уақытыңыз аз болса да, тауарды сатып алар кезде деректерді енгізген дұрыс.
• Жеке кабинетіңізге міндетті түрде лимит қойыңыз. Сондай-ақ онлайн сатып алу және банкоматтан қолма-қол ақша алу сомасын шектеңіз.
• Картаңыз жоғалған жағдайда, банкке хабарласып картаны бұғаттаңыз.
• Егер сізге қоңырау шалып картаңызға байланысты қандайда бір күдікті мәліметтер айтатын болса, байланыс нөміріңізге келген SMS кодты айтпаңыз.
•  Сондай-ақ, ай сайын өзіңізге түсетін қаржыны депозитке сақтаған тиімді. Күнделікті қажеттілікке қаражатты кез келген уақытта депозиттен төлем картасына аударып отыруға болады.