Баспанаға бағыт

Тұрғын үй бағасы қымбаттап жатыр: себебі неде?

15.01.2026

мин

0

431

Сурет: ашық дерек көзінен

2026 жыл келісімен Қазақстанда тұрғын үй бағасы айтарлықтай өсе бастады. Мамандар бұл жағдайды құрылыс көлемінің азаюымен емес, адамдардың күтімі мен нарықтағы алаңдаушылықпен байланыстырады, - деп хабарлайды Dauletten.kz.

Ресми мәліметтерге сүйенсек, соңғы бір жылда жаңа пәтерлердің бағасы 15 пайыздан аса қымбаттаған. Қайталама нарықтағы баспаналар да арзандаған жоқ. Сонымен қатар пәтер жалдау құны да едәуір өсті.

Баға ең алдымен Астана мен Алматыда көтерілді. Өткен жылдың соңына қарай соңғы екі жылдағы ең жоғары айлық өсім тіркелген.

ҚҚС әсер етіп жатыр ма?

Көпшілік бағаның өсуін 2026 жылдан бастап енгізіле бастаған қосылған құн салығымен байланыстырады. Құрылыс компаниялары да баға көтеруін осы өзгерістермен түсіндіруде.

Алайда сала мамандары пәтер бағасы бір күнде қымбаттамағанын айтады. Олардың пікірінше, құрылысшылар 2025 жылдан бастап-ақ бағаны біртіндеп өсіріп, жаңа талаптарға алдын ала дайындалған.

Сарапшылар тұрғын үй алғысы келетін азаматтарға асықпауды ұсынады. Себебі бұрын басталған құрылыс нысандарына салық өзгерістері тікелей әсер етпейді.

Ұлттық экономика министрлігі тұрғын үй бағасының өсуін ҚҚС-мен байланыстыру дұрыс емес деп санайды. Ведомство өкілдерінің айтуынша, бұл салықтың әсері бірден емес, бірнеше жылдан кейін ғана сезілуі мүмкін.

Министрлік сондай-ақ тұрғын үй бағасы бұрын да өсіп келгенін еске салады. Яғни бұл – нарыққа тән қалыпты құбылыс.

Соңғы жылдары елде тұрғын үй құрылысы қарқын алды. Өткен жылы пайдалануға берілген баспананың көлемі рекордтық деңгейге жеткен. Соған қарамастан, баға төмендеген жоқ.

Мамандар мұны екі себеппен түсіндіреді. Біріншісі – салық реформасына қатысты ақпараттың нарықта алаңдаушылық тудыруы. Екіншісі – тұрғын үйді тек банк арқылы сату талабы. Бұл ашықтықты арттырғанымен, бағаның ресми түрде өсуіне ықпал еткен.

2026 жылы баспана алуға бола ма?

Сарапшылардың айтуынша, мемлекеттік тұрғын үй бағдарламалары әлі де баспана алудың ең қолайлы жолы болып отыр. Төмен пайызды ипотекалар мен жинақ жүйелері сұранысты ұстап тұр.

Ал мұндай бағдарламаларға қатыса алмайтын азаматтарға нарықтағы жағдайдың тұрақтануын күтуге кеңес беріледі.

Қорытындылай келе, қазіргі баға өсімі тұрғын үй тапшылығынан емес, нарықтағы күтім мен психологиялық факторлардың әсерінен болып отыр. Ұсыныс жеткілікті болған жағдайда, бағаның күрт әрі ұзақ мерзімге өсуіне негіз жоқ.