Баспанаға бағыт

31 қазаннан бастап Отбасы банктегі ипотека комиссиясы өзгереді

22.10.2026

мин

0

45

Сурет: tinfo.kz

Отбасы банк 2026 жылғы 31 қазаннан бастап алдын ала және аралық тұрғын үй қарыздары бойынша комиссияның ең жоғары мөлшерін өзгертеді. 50 миллион теңгеден жоғары несие рәсімдейтін клиенттер үшін төлем көлемі артуы мүмкін. Ал қарыз сомасы 50 миллион теңгеге дейін болса, комиссия бұрынғы деңгейде қалады, — деп хабарлайды Dauletten.kz.

Қазақстанда баспана сатып алу үшін Отбасы банктен несие алуды жоспарлаған азаматтар қарызды рәсімдеуге кететін қосымша шығынды да ескеруі керек. 2026 жылғы 31 қазаннан бастап банктің алдын ала және аралық қарыздары бойынша комиссияның жоғарғы шегі қарыз сомасына қарай белгіленеді.

Комиссия – банк қарыз беруді ұйымдастырғаны үшін бір рет алатын төлем. Оның негізгі мөлшерлемесі өзгермейді: несие сомасының 1 пайызы. Алайда 31 қазаннан бастап ірі көлемдегі қарыздар үшін төлемнің ең жоғары шегі ұлғаяды.

Комиссия мөлшері қалай өзгереді?

Жаңа тәртіп бойынша комиссияның жоғарғы шегі үш санатқа бөлінеді:

50 миллион теңгеге дейінгі қарызға – несие сомасының 1 пайызы, бірақ 300 мың теңгеден аспайды;

50 миллионнан 100 миллион теңгеге дейінгі қарызға – 1 пайыз, ең көбі 500 мың теңге;

100 миллион теңгеден жоғары қарызға – 1 пайыз, бірақ 1 миллион теңгеден аспайды.

Осылайша, бұрын комиссияның ең жоғары мөлшері 300 мың теңге болса, жаңа ереже бойынша ірі қарыз алатын клиенттер үшін ол 500 мың теңгеге немесе 1 миллион теңгеге дейін жетуі мүмкін.

Ипотека алатындар қанша төлейді?

Өзгерістің қалай жұмыс істейтінін мысалмен түсіндіруге болады.

Мәселен, клиент 20 миллион теңге қарыз рәсімдесе, комиссия 200 мың теңге болады. Бұл сома жаңа ережеден кейін де өзгермейді.

Ал 70 миллион теңге несие алған жағдайда комиссияның есептік мөлшері 700 мың теңгені құрайды. Бірақ белгіленген шекке байланысты клиент 500 мың теңге төлейді. Бұрын мұндай қарыз үшін комиссия 300 мың теңгеден аспайтын. Демек, бұл жағдайда төлем 200 мың теңгеге артады.

Өзгеріс барлық салымшыға әсер ете ме?

Отбасы банк мәліметінше, клиенттердің 92 пайызы 50 миллион теңгеге дейінгі қарыз рәсімдейді. Сондықтан салымшылардың басым бөлігі үшін комиссия мөлшері бұрынғы деңгейде қалады.

Негізгі өзгеріс 50 миллион теңгеден жоғары қарыз алатындарға қатысты. Яғни комиссияның өсуі барлық ипотека алушыға бірдей әсер етпейді.

Жаңа талап қашан қолданылады?

Жаңартылған тәртіп 2026 жылғы 31 қазаннан бастап банк қабылдайтын өтінімдерге қолданылады. Ал осы күнге дейін берілген өтінімдер бұрынғы талаптар бойынша қаралады.

Банк өкілдері комиссияның негізгі мөлшерлемесі өзгермейтінін, тек қарыз көлеміне қарай оның ең жоғары шегі қайта қаралғанын түсіндірді.