Жаңалықтар

Асхат Аймағамбетов зейнетақы қаражатын икемді басқару түзетулерін түсіндірді

27.03.2026

мин

0

295

Сурет: inbusiness.kz

Қазақстанда азаматтардың Бірыңғай жинақтаушы зейнетақы қорындағы (БЖЗҚ) қаражаттарын тиімді басқаруды арттыру мақсатында жаңа түзетулер ұсынылды, - деп хабарлайды Dauletten.kz.

Қаражатты қазіргі уақытта Ұлттық банк басқарады, ал азаматтар жинақтарының 50%-ына дейін жеке басқарушы компанияларға беруге құқыққа ие. Алайда бұл мүмкіндік әзірге кеңінен қолданылмай отыр.

Ұсынылған екі негізгі түзету бар:

1. Жеке басқарушы компанияларға берілетін қаражат шегін ұлғайту. Қазіргі 50% шегі 75%-ға дейін көтерілмек. Мұнда басты ерекшелік – бұл міндет емес, азаматтардың өз еркімен қолдана алатын құқығы.
2. Икемді инвестициялық стратегияға рұқсат беру. Азаматтар өз таңдаған басқарушы компаниясы арқылы қаражаттың бір бөлігін консервативті, бір бөлігін тәуекелі жоғары, ал қалған бөлігін теңгерімді құралдарға инвестициялауға мүмкіндік алады. Бұл «бәрі немесе ештеңе» қағидатына сүйенбейтін, саналы таңдау жасауға мүмкіндік беретін жүйе.

Түзетулердің негізгі мақсаты – қаражаттың тек сақталуы емес, сонымен бірге тиімді жұмыс істеуін қамтамасыз ету. Бұл қадам азаматтарға өз жинақтарын басқару құқығын кеңейтетін әрі әділетті жүйені қалыптастыруға бағытталған.

Қазіргі уақытта түзетулер талқылау кезеңінде, бірақ олар жүзеге асқан жағдайда, азаматтардың қаржылық мүмкіндіктерін кеңейтуге және жинақтардың табыстылығын арттыруға мүмкіндік туады.