|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Астанада алғаш рет қазақтың ұлттық сусыны – қымызға арналған ірі көлемді гастрофестиваль өтіп жатыр. "BaiQymyz" деп аталған шараның алғашқы күнінде 40 мыңнан астам адам қатысып, еліміздің түкпір-түкпірінен және шетелден келген қонақтар ұлттық сусыннан дәм татты, - деп хабарлайды Dauletten.kz.
Елордалықтар мен қала қонақтарына қымыздың әртүрлі түрлері ұсынылды. Барлығы 30 тоннаға жуық қымыз елордаға жеткізілген. Бұл – Қазақстан тарихындағы рекордтық жағдай.
– Біз еліміздің әр өңірінен 50-ден астам қымыз өндірушіні жинадық. Әрқайсысы 500 литрден артық қымыз алып келді. Жерлестеріміздің белсенділігі мен елордалықтардың қызығушылығының арқасында жаңа рекорд орнаттық. Егер фестиваль жұртқа ұнаса – біз оны жыл сайын өткізуді жоспарлап отырмыз, – деді фестиваль ұйымдастырушысы Жұмажан Қалтаев.
Фестивальге қатысушылар арасында Қарағанды облысы, Үштөбе ауылынан келген Серғазы Исабеков те бар. Ол күніне 25 бие сауып, шамамен 150 литр қымыз өндіретінін айтты.
– Бүгін елордаға ауылымыздан 600 литр қымыз алып келдім. Қалалықтар нағыз ауыл қымызының дәмін көрсін дедім, – дейді ол.
"BaiQymyz" тек гастрономиялық шара ғана емес, сонымен қатар қазақ халқының мәдениеті мен салт-дәстүрін дәріптейтін алаңға айналды. Қонақтар ұлттық тағамдардан дәм татып, фольклорлық музыка тыңдап, қолөнер жәрмеңкелерін аралап, концерттік бағдарламалар мен түрлі байқауларға қатысты. Солардың бірінде жеңімпаз 2 литр қымыз ішіп, арнайы сыйлыққа ие болды.
