Жаңалықтар

eGov.kz порталында жаңа қызмет іске қосылды

09.01.2025

1 мин

0

327

Сурет: gov.kz

eGov.kz порталында жаңа қызмет іске қосылды: қазақстандықтар бұрын алған колледж дипломдары мен мектеп аттестаттарын цифрландыра алады, - деп хабарлайды Dauletten.kz.

Порталда білім туралы құжаттарды цифрландыруға арналған қызмет пайда болды.

- Енді азаматтар құжаттағы қате деректерді түзетіп қана қоймай, оның цифрлық нұсқасын жасауға өтініш бере алады. Бұл қызмет бұрын алынған дипломның немесе аттестаттың сканерленген көшірмесі болған жағдайда ғана қолжетімді, – делінген хабарламада.

“Білім туралы құжаттардағы мәліметтерді жаңарту (түзету)” қызметі кеңейтілді. Бұрын бұл тек қате ақпаратты түзетуге мүмкіндік берсе, енді құжаттарды цифрландыруға өтініш беру мүмкіндігі қосылды.

Қызметті пайдалану үшін:

• eGov.kz порталында авторизациядан өтіп, “Азаматтарға” – “Білім” бөлімін таңдаңыз;
• “Білім туралы құжаттардағы мәліметтерді өзектендіру (түзету)” қызметін таңдап, “Онлайн сұрау” батырмасын басыңыз;
• “Білім туралы құжаттар туралы ақпаратты цифрландыру” қызметін таңдап, құжаттың түрін көрсетіп, оның сканерленген көшірмесін тіркеңіз;
• қызметтің нәтижесін жеке кабинетіңіздің “Қызметтерді алу тарихы” бөлімінен көруге болады.

Құжаттарды цифрландыру кезең-кезеңмен жүзеге асырылады. Қазіргі уақытта 1980–2023 жылдар аралығында берілген орта білім, техникалық және кәсіби білім беру құжаттары цифрландыруға жатады. Қызмет көрсету уақыты – 5 жұмыс күні.

Егер ұсынылған құжаттар немесе деректер дұрыс болмаса, қызмет көрсетуден бас тартылуы мүмкін.

Жаңартылған функционал ҚР Цифрлық даму, инновациялар және аэроғарыш өнеркәсібі министрлігі, “Ұлттық ақпараттық технологиялар” АҚ, ҚР Оқу-ағарту министрлігі және “Ахмет Байтұрсынұлы атындағы “Талдау” ұлттық зерттеулер және білімді бағалау орталығы” АҚ-ның бірлескен жұмысы нәтижесінде іске асырылды.