Жаңалықтар

eGov-та жаңа функция пайда болды

06.05.2025

мин

0

1745

Сурет: gov.kz

eGov порталында жаңа қызмет пайда болды, - деп хабарлайды Dauletten.kz.

Енді әскери оқу орындарының бұрынғы курсанттары оқу орнына қайта қабылдану үшін онлайн түрде өтінім бере алады.

- Қызмет тегін ұсынылады және кем дегенде бір семестр оқуын аяқтаған азаматтар үшін қолжетімді, – деп жазылған хабарламада.

Осыған дейін мұндай рәсім қолжетімсіз болған және оқу орнына барып, өтінішті жеке тапсыруды талап еткен. Сондай-ақ жеке куәлік, транскрипт, қызмет орнының мінездемесі, суреттер, әскери билет көшірмесі және басқа да құжаттардан тұратын құжаттар пакетін жинау қажет болған.

- Өтінімді оқудан шығарылған күннен бастап бір жыл ішінде ғана беруге болады. Егер бұл мерзім өтіп кетсе, оқу орнына қайта қабылдамайды, – деп жазылған хабарламада.

Әскери оқу орнына қайта қабылдану үшін мына әрекеттерді орындау қажет:

• eGov.kz порталына кіріп, тіркеліп, "Азаматтарға" – "Әскери есеп және қауіпсіздік" – "Әскери қызмет" бөліміне өтіңіз;
• Қазақстан Республикасы Қорғаныс министрлігінің әскери оқу орындарына қалпына келтіру" қызметін таңдап, "Қызметке онлайн тапсырыс беру" батырмасын басыңыз;
• оқу орнын таңдап, оқудан шығарылғаннан кейін қанша уақыт өткенін көрсетіп, жеке деректерді пайдалануға келісім беріңіз;
• тұрғылықты мекен жайыңызды көрсетіп, қажет құжаттарды тіркеңіз;
• өтінімді қол қоюдың қолжетімді тәсілдерінің бірімен растаңыз;
• кейін "Көрсетілген қызметтер тарихы" бөлімінен нәтижені тексере аласыз.

Өтінімді қарау мерзімі – 20 жұмыс күні.