Жаңалықтар

Илон Маск SpaceX-пен бірге Техаста қала салмақ

17.12.2024

1 мин

0

181

Сурет: Dauletten.kz

Илон Маск SpaceX-пен бірге Техаста қала салмақ. 53 жастағы миллиардер Илон Маск биылғы жылдың басында SpaceX-тің штаб-пәтерін Техасқа көшіру туралы мәлімдеді. Бұл шешім Калифорнияның гендерлік сәйкестілік туралы жаңа заңдарына байланысты қабылданған. Енді Маск SpaceX-тің Техастағы штаб-пәтерін жеке қалаға айналдыруды жоспарлап отыр, - деп хабарлайды Dauletten.kz.

Илон Маск өз амбициялық жоспарларымен таң қалдыруын жалғастыруда. Жыл басында миллиардер SpaceX штаб-пәтерінің Техасқа, Starbase деп аталатын нысанға көшетінін мәлімдеген болатын. Бұл кешен Техас штатының оңтүстігінде, Мексика шекарасына жақын Бока-Чика жағажайында орналасқан.

Алайда Маск мұнымен тоқтап қалған жоқ. Ол Starbase-ті толыққанды заңды мәртебесі бар қалаға айналдыруды жоспарлап отыр. Бейсенбі күні SpaceX компаниясы Кэмерон округінің билігіне ресми хат жолдап, жергілікті тұрғындар арасында осы идеяны қолдау үшін дауыс беру ұйымдастыруды сұрады.

- Starbase-ті толыққанды қауымдастық ретінде дамытуымыз қажет, бұл Starship-ті жедел әзірлеу мен өндіру үшін жұмыс күшінің өсуін қамтамасыз етеді, – делінген компанияның хатында. Маск бұл бастаманы қолдап, X желісінде: "SpaceX-тің штаб-пәтері енді ресми түрде Starbase қаласы, Техас штатында!” – деп жазды.

Маск үшін Техасқа көшу – жаңа сынақтарға қайта оралу. Калифорнияда жиырма жыл өмір сүргеннен кейін, oл бұл жерге 2020 жылы көшіп келген. Енді оның жоспары әдеттегі шекарадан асып, тек SpaceX үшін ғана емес, Рио-Гранде аңғарындағы жаңа қала үшін де болашақ құруға бағытталған. Маск бұл идеяны 2021 жылдан бері ойлап жүрген, сол кезде әлеуметтік желіде алғаш рет атап өтіп, қысқаша былай деп жазған еді: “Техаста Starbase қаласын құрамыз”.

SpaceX-тің аймақта жылдам дамуы жергілікті тұрғындардың сынына ұшырады. Биылғы жылдың шілде айында Save RGV ұйымы компанияға қарсы сотқа шағым түсіріп, оны экологиялық нормаларды бұзды деп айыптады, соның ішінде ластанған суды көршілес шығанаққа төккенін алға тартты.

Өз кезегінде SpaceX бұл айыптауларды жоққа шығарып, мемлекеттік тексеріс қоршаған ортаға қауіп төндірмейтінін анықтағанын мәлімдеді және шағымды “негізсіз” деп атады.