Баспанаға бағыт

Ипотеканы тиімді өтеудің жолдары: сарапшы кеңесі

24.07.2025

1 мин

1

641

Сурет: pinterest.com

Ипотекалық қарызды жылдар бойы ай сайын төлеу кез келген адам үшін оңай емес. Сол себепті табыс көбейіп, қосымша қаражат пайда болған сәтте туындайтын басты сұрақтардың бірі: ипотеканы мерзімінен бұрын өтеу қаншалықты тиімді және оны қалай дұрыс жасауға болады? Бұл сауалға қаржылық кеңесші Сұлтан Елемесов жауап береді, - деп хабарлайды Dauletten.kz.

Оның айтуынша, ипотеканы мерзімінен бұрын өтейтін екі негізгі тәсіл бар:

1. Ай сайынғы төлемді азайту

2. Қарыз мерзімін қысқарту.

Әр әдістің өз артықшылығы мен шектеулері бар.

1. Ай сайынғы төлемді азайту

Ай сайынғы төлемді төмендету – табысы тұрақсыз немесе шығыны көп отбасылар үшін тиімді шешім. Бұл жағдайда банкке қосымша төлем жасалып, қайта есептеу жүргізіледі де, төлем мөлшері азаяды.

— Көпшілік үшін бұл ыңғайлы тәсіл. Бірақ үнемделген қаражатты оңды-солды жұмсамай, қайтадан мақсатты пайдалану маңызды. Қаржылық сауат болмаса, бұл әдістің пайдасы аз, — дейді Сұлтан Елемесов.

2. Қарыз мерзімін қысқарту

Егер сіз бұрынғы ай сайынғы төлемді сақтай отырып, қосымша қаражат енгізсеңіз, несие мерзімі қысқарады. Бұл – ипотекадан тезірек құтылуға ұмтылатындар үшін тиімді жол.

— Мұның басты артықшылығы – несиенің нақты қанша жылға қысқарғанын бірден байқайсыз. Бұл адамға психологиялық жеңілдік береді. Бірақ ай сайынғы қаржылық жүктеме өзгермейді. Сондықтан бұл жолды таңдаушыларда тұрақты табыс пен қаржылық резерв болуы тиіс, — дейді сарапшы.

Қай тәсіл тиімдірек?

Екі тәсіл де тиімді болуы мүмкін. Ең маңыздысы – артық қаржыны мақсатты пайдаланып, оны қайтадан ипотеканы жабуға бағыттау. Қай жолды таңдаған дұрыс – бұл сіздің қаржылық жағдайыңыз бен өмір салтыңызға байланысты.

Мысал ретінде қарастырайық:

Сіз 10 миллион теңгелік ипотекаға ай сайын 180 мың теңге төлеп отырсыз. Қосымша 1 миллион теңге төлеуге мүмкіндік туды. Енді сіз:

• Ай сайынғы төлемді азайтсаңыз – төлем мөлшері 160 мың теңгеге дейін төмендейді;
• Мерзімді қысқартсаңыз – бұрынғы төлеммен ипотекадан шамамен 2 жыл ертерек құтыласыз.

Нені ескеру қажет?

Көп жағдайда банктер мерзімінен бұрын өтеуге қатысты шарттарды автоматты түрде өзгертпейді. Сондықтан қарыз алушы арнайы өтініш жазып, қай жолды таңдайтынын банкке хабарлауы тиіс.