Жаңалықтар

Ішкі істер министрлігі көлік жүргізушілеріне үндеу жасады

08.11.2024

1 мин

0

641

Сурет: taxisolnce

Ішкі істер министрлігі көлік жүргізушілеріне жолда абай болуға шақырды, - деп хабарлайды Dauletten.kz.

Қазақстанның түрлі аймақтарында ауа райының нашарлауына байланысты Ішкі істер министрлігі жол қозғалысына қатысушыларға сақтық шараларын ұстануды ескертті.

- Ауа райының күрт өзгеруіне орай жолдарда көріну төмендеуі мүмкін, мұзды және тайғақ жерлер қауіпті жағдайларға алып келуі ықтимал. Сондай-ақ, ауа райының нашарлауы көлікке де кері әсерін тигізуі мүмкін, - деп ескертті ІІМ әкімшілік полиция комитетінің ерекше тапсырмалар жөніндегі аға инспекторы Ақтоты Боранова.

Ведомство бірқатар ұсыныстар берді:

• Көліктің техникалық жағдайын, тежегіш жүйесін тексеріңіз.
• Терезе тазалағыштарды және сұйықтық деңгейін бақылаңыз!
• Қысқы шиналарды қолданыңыз – бұл жолда қауіпсіздікті арттырады және тайғақ жерде жақсы ұстайды.
• Техникалық регламент бойынша қысқы кезеңде қысқы шиналарсыз көлікті пайдалануға тыйым салынады!
• Қашықтықты сақтаңыз! Әсіресе қыс мезгілінде алдындағы көлікпен ара қашықтықты ұзақ ұстаңыз, себебі тайғақта тежегіш жолы бірнеше есе ұзарады.
• Жол қозғалысына қатысушылардың барлығына абай болыңыз! Жаяу жүргіншілерге де назар аударыңыз. Есіңізде болсын, кішігірім қателік үлкен апатқа әкелуі мүмкін.
• Ауа райының қолайсыздығына байланысты жылдамдықты шамадан тыс арттырмаңыз, себебі бұл көлікті бақылауды жоғалтуға себеп болуы мүмкін.
• Жолды алдын ала жоспарлап, ауа райы болжамын қадағалап, қала сыртындағы жолдардың жабылуы туралы хабарламаларды бақылаңыз.
• Егер жолдар жабық болса, елді мекендерден тыс жерлерге шығуды шектеңіз.

- Құрметті жол қозғалысына қатысушылар! Жол ережелерін сақтау – сіздің жауапкершілігіңіз. Өзіңіздің және өзгенің өміріне немқұрайлы қарамаңыз. Жолдағы қауіпсіздік пен ережелерді сақтау өзіңізден басталады. Үйде сізді жақындарыңыз күтіп отырғанын ұмытпаңыз! – деп атап өтті Боранова.