Жаңалықтар

Қазақстандық әнші "Славян базары 2025" байқауының жеңімпазы атанды

14.07.2025

1 мин

0

167

Сурет: ашық дереккөз

Қазақстандық әнші Алмагүл Батталиева "Славян базары 2025" байқауында Гран-при иегері атанды, - деп хабарлайды Dauletten.kz.

2025 жылғы 10–13 шілде аралығында Беларусьтің Витебск қаласында өткен "Славян базары" халықаралық өнер фестивалінде қазақстандық әнші Алмагүл Батталиева Гран-при жүлдесін жеңіп алды. Ол байқау қорытындысы бойынша 137 ұпай жинады.

Финалда Алмагүл тыңдарманның жүрегін "Вечность" әнімен жаулап, қазылар алқасының жоғары бағасына ие болды.

Әнші Жетісу облыстық Дәнеш Рақышев атындағы филармонияның әртісі. Байқау барысында ол күрделі вокалдық техника талап ететін әлемдік және ресейлік хиттерді орындап, кәсіби шеберлігі мен сахнадағы тартымдылығымен ерекшеленді.

Байқау нәтижесі:

•    Гран-при – Алмагүл Батталиева (Қазақстан)

•    1-орын – Валерия Бернатович (Беларусь)

•  2-орын – Давид Киракосян (Армения) және Доменико Барбера (Италия)

•  3-орын – Эрик Ахметов (Ресей) және Рыскелді Сарбеков (Қырғызстан)

Алмагүл Батталиева — Алматы қаласының тумасы. Ол П. И. Чайковский атындағы Алматы музыкалық колледжінің түлегі. Вокалдан бөлек, бірнеше музыкалық аспапты еркін меңгерген. Бұған дейін де ол "Жас Қанат – 2023", "Алматым жүрегімде" сынды байқауларда топ жарған.