|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
2025 жылғы 13 наурыздан бастап күшіне енген жаңа нормаларға сәйкес, енді электрондық цифрлық қолтаңбаны (ЭЦҚ) заңсыз пайдаланған адамдар да, оны берген тұлғалар да жауапқа тартылады, - деп хабарлайды Dauletten.kz Цифрлық даму, инновациялар және аэроғарыш өнеркәсібі министрлігіне сілтеме жасап.
Министрліктің мәліметінше, жеке және заңды тұлғалардың дербес деректерін қорғау мен электрондық цифрлық қолтаңба салаларындағы әкімшілік құқық бұзушылықтар үшін жауапкершілік мерзімі ұзартылды. Бұрын бұл мерзім құқық бұзушылық жасалған күннен бастап екі айды құраса, енді ол бір жылға дейін ұзарды.
Сонымен қатар, дербес деректерді заңсыз жинау, өңдеу және қорғау шараларын сақтамау секілді заңбұзушылықтар үшін ҚР Әкімшілік құқық бұзушылық туралы кодексінің (ӘҚБтК) 79-бабына сәйкес айыппұл мөлшері үш есеге артты. Бұрын айыппұл көлемі құқық бұзушылықтың сипатына және кәсіпкерлік субъектісінің санатына қарай 10-нан 1000 АЕК-ке дейін өзгеріп отырса, енді ол 30-дан 2000 АЕК-ке дейін ұлғайтылды.
- Сонымен бірге, Қазақстан Республикасының электрондық құжат және электрондық цифрлық қолтаңба туралы заңнамасын бұзу бойынша ҚР ӘҚБтК-нің 640-бабында жаңа әкімшілік құқық бұзушылық түрі енгізілді. Яғни, бұдан былай басқа адамның ЭЦҚ кілтін пайдаланғандар да әкімшілік жауапкершілікке тартылады. Бұрын мұндай жауапкершілік тек ЭЦҚ кілтін үшінші тұлғаларға заңсыз беру немесе оны қорғауға қатысты шараларды қабылдамау жағдайларына ғана қолданылатын. Жаңа өзгерістерден кейін ЭЦҚ-ны заңсыз берген тұлғалар да, оны пайдаланғандар да жауапқа тартылады, — делінген хабарламада.
Қабылданған шаралар азаматтардың жеке деректерін қорғауды күшейтуге, электронды цифрлық қолтаңбаны пайдалану қауіпсіздігін қамтамасыз етуге, ЭЦҚ-ға байланысты алаяқтық әрекеттерді азайтуға, сондай-ақ ақпараттандыру саласындағы құқық бұзушылықтар үшін жауапкершілікті арттыруға бағытталған.
