|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақстанда Илон Масктың компаниясына тиесілі спутниктік интернет қызметі заңды түрде қолжетімді болады. Цифрлық даму, инновациялар және аэроғарыш өнеркәсібі министрлігі мен Starlink (SpaceX компаниясының еншілес құрылымы) Қазақстан аумағында спутниктік интернетті ресми іске қосу туралы келісімге қол қойды, - деп хабарлайды Dauletten.kz.
Министрліктің мәліметінше, SpaceX-тің еншілес компаниясы Starlink 2025 жылдың үшінші тоқсанынан бастап Қазақстан тұрғындарына спутниктік терминалдарды сатуды бастайды.
- Бұл бастама еліміздің шалғай және инфрақұрылымы нашар аудандарын жоғары жылдамдықты интернетпен қамтамасыз ету жолында маңызды қадам болады, – деп атап өтті ведомство өкілдері.
Starlink технологиясы талшықты-оптикалық байланыс желісін тарту экономикалық немесе техникалық тұрғыдан тиімсіз өңірлерде сапалы интернетпен қамтуға мүмкіндік береді.
Бұған дейін Starlink Қазақстанда пилоттық режимде жұмыс істеп, тек мектептерге интернет ұсынып келген. Жеке тұлғалар үшін бұл қызмет ресми түрде қолжетімді болмаған. Енді компания ақпараттық қауіпсіздік пен байланыс саласындағы заң талаптарының барлығын орындауға міндеттеліп, тиісті келісімге қол жеткізілді.
Цифрлық даму министрі Жаслан Мадиевтің айтуынша, биыл қажетті техникалық және әкімшілік жұмыстар атқарылады. Осылайша, Қазақстан азаматтары спутниктік интернетті заңды түрде сатып алып, орнатып және пайдалануға мүмкіндік алады.
Starlink қызметіне қосылу арнайы пайдаланушы құрылғылары – спутниктік терминалдар арқылы жүзеге асады. Енді қазақстандықтар бұл құрылғыларды заң аясында сатып алып, тіркей алады.
