Жаңалықтар

Тамыз айында кімдер 63 мың теңге алады?

31.07.2020

1 мин

493

37958

Еңбек және халықты әлеуметтік қорғау министрлігі тамыз айында кімдерге 21 250 теңге төленетінін айтты.

30 шілдеде вице-премьер Ералы Тоғжанов карантиннің тағы екі аптаға ұзартылуына байланысты азаматтарға біржолғы әлеуметтік төлемнің жартысы, яғни 21 250 теңге төленетінін мәлімдеген еді.

Еңбек министрлігінің ақпаратынша, 42500 теңгені шілде айында алған азаматтарға 21 250 теңге автоматты түрде аударылады.

"Карантин ұзартылғаннан кейін біржолғы төлем тағайындауға алғаш рет өтініш берген азаматтарға төлем 1,5 ең төменгі жалақы немесе 63 750 теңге (42 500 + 21 250 теңге) мөлшерінде тағайындалады", - делінген ведомствоның сайтында.

Тамызда төлемді кімдер алады

Бұған дейін хабарланғандай, президенттің тапсырмасымен шілдеде карантиннің күшейтілуіне байланысты кірісін жоғалтқан қазақстандықтарға ең төменгі жалақы – 42 500 теңге мөлшерінде біржолғы төлем тағайындалады.

Әлеуметтік төлемге үміткерлер:

• мемлекеттік заңды тұлғалардың (шаруашылық жүргізу құқығындағы мемлекеттік кәсіпорындардың қызметкерлерінен басқа), сондай-ақ акциялары мен жарғылық капиталындағы қатысу үлестерінің 100%-ы мемлекетке тиесілі заңды тұлғалардың, екінші деңгейлі банктердің, банк операцияларының жекелеген түрлерін жүзеге асыратын ұйымдар мен  олармен үлестес заңды тұлғалардың қызметкерлерін қоспағанда, жалақысы сақталмайтын еңбек демалысындағы қызметкерлер;
• жеке кәсіпкерлер;
• жеке практикамен айналысатын адамдар;
• азаматтық-құқықтық сипаттағы шарт бойынша табыс алатын жеке тұлғалар;
• бірыңғай жиынтық төлемді төлеушілер.

30 шілдегі жағдай бойынша азаматтардан біржолғы төлем тағайындауға 2,3 миллионнан астам өтініш қабылданған. Төлем 2 миллион 80 мың адамға тағайындалды. Ақша 2 миллион 58 мың қазақстандыққа аударылды.

Өтінішті Egov.kz, 42500.enbek.kz порталдары, telegram-боттар және екінші деңгейлі банктердің мобильдік қосымшалары мен интернет-ресурстары арқылы беруге болады.