|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Соңғы уақытта, әсіресе жекеменшік стоматологиялық клиникаларда балаларға жалпы наркозбен бірнеше тісті бір мезетте емдеуге қатысты арыздар жиілеп жатыр. Бұл туралы ДСМ басшысы Ақмарал Әлназарова айтты, - деп хабарлайды Dauletten.kz.
Денсаулық сақтау министрі Ақмарал Әлназарова балаларды жалпы анестезиямен емдеу тек нақты медициналық көрсетілімдер болғанда ғана жүргізілуі тиіс екенін атап өтті. Оның айтуынша, мұндай араласу – аса күрделі медициналық процедура, сондықтан кез келген клиника анестезиология және реанимация талаптарын толығымен орындауы қажет.
- Балаларды жалпы наркозбен емдеу – кез келген уақытта қолданылатын “ыңғайлы әдіс” емес. Клиника мемлекеттік болсын, жекеменшік болсын, бұл үшін арнайы жабдық, білікті анестезиолог және қауіпсіздіктің барлық стандарты болуы міндетті, – деп түсіндірді министр.
Оның сөзінше, Бас прокуратура тапсырмасына сәйкес ел аумағындағы стоматологиялық ұйымдарда жоспардан тыс тексерулер жүргізілуде. Барлығы – 622 нысан.
Қазіргі көрсеткіштер бойынша:
290 тексеру тіркелген,
135-і аяқталған,
103-і әлі жүргізіліп жатыр,
52 клиника жұмыс істемегендіктен тізімнен шығарылған,
26 нысан тексеруге тіркелу кезеңінде.
Өңірлер прокуратурасы жолдаған 316 клиниканың ішінде:
34-і МӘМС/ТМККК аясында қызмет көрсетеді,
282-сі тек ақылы форматта жұмыс істейді.
Министр ұзаққа созылған наркоз бен бір сеанста көп көлемді ем жүргізу баланың жүрек-қантамыр, тыныс алу және жүйке жүйесіне қосымша қауіп төндіретінін еске салды. Оның айтуынша, кейбір жекеменшік орталықтар ата-аналарға «барлық тісті бір ретте емдеу» сияқты коммерциялық жағынан тиімді ұсыныстар жасайды, бірақ мұндай тәсіл тек дәлелденген медициналық қажеттілік болғанда ғана қолданылуы тиіс.
Әлназарова ата-аналарды ерекше мұқият болуға шақырды.
- Процедураға келісім бермес бұрын тәуекелдер, көрсеткіштер және жүргізілу тәртібі туралы толық ақпаратпен танысу маңызды. Баланың қауіпсіздігі әрқашан бірінші орында тұруы керек. Денсаулық сақтау министрлігі осы ұстанымды қатаң түрде сақтайды, – деді ол.
