Жаңалықтар

Ақтөбеде 60 млрд теңгеге заманауи шыны зауыты салынады: Олжас Бектенов тиісті қаулыға қол қойды

08.10.2026

мин

0

56

Сурет: Ғаламтордан

Ақтөбе қаласында жылына 256 млн дана шыны ыдыс шығаратын жаңа зауыт бой көтереді. Премьер-министр Олжас Бектенов қол қойған қаулыға сәйкес, Өнеркәсіп және құрылыс министрлігі мен «Aktobe Steklo» ЖШС арасында 60 млрд теңгелік инвестициялық келісім бекітілді, — деп хабарлайды Dauletten.kz.

Жоба ішкі нарықты отандық өніммен қамтамасыз етіп, импортты алмастыруға бағытталған.

Мемлекет басшысының өңдеу өнеркәсібін дамыту, инвестиция тарту және өндірісті локализациялау жөніндегі тапсырмасы аясында Ақтөбе облысында ірі өнеркәсіптік жоба іске асырылмақ. Қазіргі таңда өңірде өзіндік шыны өндірісі жоқ, ал жаңа кәсіпорын бұл олқылықтың орнын толтырып, ішкі нарықтағы сұранысты сапалы өніммен өтейді.

Жобаның негізгі көрсеткіштері:

 Инвестиция көлемі: 60 миллиард теңге;

 Өндірістік қуаты: Жылына 256 миллион бірлік шыны ыдыс;

 Құрылыс мерзімі: 2026 жылдың IV тоқсанында басталып, 2029 жылы пайдалануға беріледі;

 Жаңа жұмыс орындары: 300-ге жуық тұрақты жумыс орны құрылады.

Өнімді өткізу және жергілікті қамту

Зауытта өндірілген өнімнің 80%-ы отандық нарыққа бағытталса, қалған 20%-ы Орталық Азия елдеріне экспортталады. Өндіріс процесінде жергілікті табиғи минералды шикізат пен қазақстандық компаниялардың тауарлары мен қызметтері басымдыққа ие болады. Сондай-ақ отандық мамандардың біліктілігін үздіксіз арттыру бағдарламалары қарастырылған.

Заманауи технология және экологиялық бастама

Жаңа кәсіпорын шикізатты сұрыптау, процесті басқару және сапаны бақылаудың толық автоматтандырылған жүйелерімен жабдықталады. Жобаның басты ерекшелігі – экологиялық бағыттылығында. Қаржыландыру кезеңінде 245 мың тоннадан астам шыны қалдығын өңдеп, қайта пайдалану жоспарланған. Бұл аймақтағы шыны сынықтарын жинау, сұрыптау және шоғырландыру экожүйесінің дамуына серпін береді.

Отандық шыны ыдыстардың өндірісі тамақ және қайта өңдеу өнеркәсібінің дамуын жеделдетеді. Жеткізу мерзімі қысқарып, логистикалық тізбек жеңілдейді. Бұл сабақтас салалардағы кәсіпорындардың тұрақты әрі үздіксіз жұмыс істеуіне кепілдік береді.