|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақстан Республикасы Парламенті Мәжілісінің депутаты Олжас Құспеков автокөлік лизингін жеке тұлғаларға беру механизмін жетілдіруге қатысты ұсыныстарымен Премьер-Министр Олжас Бектеновке ресми хат жолдады. Өз өтініші туралы депутат әлеуметтік желілерінде де хабарлап, дер кезінде түзетулер енгізілмесе, жаңа құрал азаматтардың пайдасына жұмыс істемей қалуы мүмкін екенін атап өтті. Бұл туралы "Республика" партиясының баспасөз қызметі мәлім етті, - деп хабарлайды Dauletten.kz.
Ішкі сауда қағидалары жеке тұлғаларға жаңа автомобильдерді лизингке беруге мүмкіндік бергенімен, жүйе әлі жұмыс істемей тұр. Депутат Олжас Құспековтің айтуынша, қажетті құқықтық негіз толық қалыптаспаған: автолизинг салық заңнамасында белгіленбеген, салықтық режимі анықталмаған, негізгі тетіктер сипатталмаған. Бұл компаниялардың да, азаматтардың да тиімді шарттарға қол жеткізуіне кедергі болып отыр.
Премьер-Министрге жіберген хатында ол жеке тұлғаларға арналған лизингті Салық кодексінде бекітуді, бизнеске берілетін салықтық жеңілдіктерді осы бағытқа да қолдануды және ЖТС-тың бір бөлігін бастапқы жарнаға немесе төлемдерге пайдалану мүмкіндігін енгізуді ұсынды.
Сонымен қатар депутат айыппұлдарды көлікті нақты пайдаланушыға есептеу, лизинг нысанасын сотсыз қайтару тетігін реттеу, лизингтік ұйымдарға бірыңғай талаптар белгілеу және процесті eGov арқылы толық цифрландыру қажеттігін атап өтті.
Құспеков бұл саланы қолдау үшін мемлекеттік бағдарлама қажет екенін, оның сыйақыны субсидиялау мен бастапқы жарнаны өтеуді қамтуы тиіс екенін айтты. Оның пікірінше, мұндай шаралар автолизингті қолжетімді етіп, нарықтың дамуына серпін береді.
