Қаржылық сауат

Kaspi QR-ды пайдаланудың пайдасы қандай?

04.02.2021

1 мин

14

10579

Бүгінде Kaspi.kz мобильді қосымшасын тұтынушылар саны 7 миллионнан асады. Бұл Қазақстан халқының 50 процентке жуығы Kaspi Bank клиенті деген сөз. Себебі банк қосымшасы әрбір клиенттің жеке төлемдері мен салымдарының тарихын көрсетіп қана қоймай, түрлі қызметтерді жылдам орындауға мүмкіндік береді. Қосымша күннен-күнге дамып келеді, оның көпшілік қолдана бермейтін пайдалы тұстары да аз емес. Сондықтан бүгінгі материалда Kaspi QR-дың пайдасына тоқталуды жөн көрдік.

Kaspi QR – Kaspi.kz мобильді қосымшасындағы ыңғайлы, қауіпсіз әрі тиімді қызмет түрі. Оның көмегімен сіз:

• банк серіктестері дүкендерінде алған затыңыздың ақысын карта шығарып, не ПИН-код теріп әуре болмай-ақ, үнемі өзіңізбен алып жүретін телефон арқылы төлей аласыз;
• кез келген Kaspi Картомат, Kaspi Банкомат және Kaspi Терминалда картасыз және ЖСН-ді термей-ақ ақшаны шешу және шотты толтыру мүмкіндігіне ие боласыз.

QR-код арқылы төлем жасау үшін Kaspi.kz мобильді қосымшасын ашып, Kaspi QR қызметін таңдаңыз. Телефон экранында QR-код сканері шығады. Кассадағы сатушы ұсынған QR-кодты сканерлеп, төлеу жолын таңдап, сатып алуды растаңыз.

Ақшаны шешіп, шотты толтыру үшін де жоғарыда көрсетілген Kaspi QR қызметін таңдап, банкомат экранындағы QR-кодты сканерлеп, экранда көрсетілетін келесі қадамдарды орындайсыз.

Kaspi QR-дың тағы бір тиімді тұсы – бонустар жинау мүмкіндігі. Әрине, стандартты 0,5 проценттік бонус картамен төлем жасағанда да түседі. Бірақ кейбір акциялар аясында берілетін бонустарды тек Kaspi QR қызметінің көмегімен алуға болады (Акциялар туралы ақпаратты мобильді қосымшаның «Акциялар» бөлімінен көре аласыз). Мысалы, ақпанның соңына дейін Kaspi Bank-пен серіктес Magnum Cash&Carry, Small, КеңMart сияқты супермаркеттерде алған азық-түлігіңіздің ақысын Kaspi QR арқылы төлесеңіз, 3 процент бонус сыйға беріледі. Мәселен, сіз Kaspi Bank-пен серіктес супермаркеттердің бірінен 8 500 теңгеге азық-түлік алдыңыз делік. Оның ақысын Kaspi Gold картасы арқылы төлейтін болсаңыз, шотыңызға 42,5 теңге көлеміндегі стандартты бонус (0,5%) түседі. Ал сол 8 500 теңгені Kaspi QR арқылы төлесеңіз, шотыңызға 255 теңге көлеміндегі акциялық бонус (3%) түседі.           

Бонустарды қоғамдық көліктің ақысын төлеуге, ұялы телефоныңызға бірліктер жинауға, ақылы лифт карталарын толтыруға пайдалануға болады. Сондай-ақ QR-код арқылы төлем жасағанда да бонусты қолдана аласыз. Ол үшін сатушы ұсынған QR-код-ты сканерлеген соң «Бонустарды жұмсауды» белгілеу керек. Осы тәсіл арқылы Нұр-Сұлтан қаласындағы қоғамдық көлік ақысын да өтеуге болады. Ол үшін мобильді қосымшаны ашып, «Төлемдер» қызметіне кіреміз. Барлық төлемдердің ішінен «Транспортты» таңдаймыз. Кейіннен «Қоғамдық көлік» қызметінің ішінен «TRANSCARD. Транспорттың коды арқылы төлеуді» басып, автобус терезесінде көрсетілген 5 таңбалы кодты тереміз немесе автобустың QR-кодын сканерлейміз. Содан соң «Бонустарды жұмсауды» белгілейміз.

Kaspi.kz мобильді қосымшасының басқа да мүмкіндіктерімен танысу үшін қосымша мәзіріндегі Kaspi Гид қызметін пайдалануға болады.

Аяулым ТУРАБЕКОВА