Жаңалықтар

Купеде кіммен бірге отыратыныңыз алдын ала белгілі болады: ҚТЖ жаңа жүйені зерттеп жатыр

04.09.2026

мин

0

19

Пойызда жолаушылардың кіммен бір купеде отыратынын таңдауға мүмкіндік беретін жаңа жүйе ұсынылды. ҚТЖ бұл бастаманы қазір зерттеп жатқанын мәлімдеді, — деп хабарлайды Dauletten.kz.

Қазақстанда пойыздағы жолаушыларды бір купеге жынысына қарай орналастыру мәселесі талқыланып жатыр. Ұсыныс бойынша бір купеге билет алған алғашқы жолаушының жынысына қарай кейінгі орындар да сол жыныстағы адамдарға сатылуы мүмкін.

Мұндай тәжірибе шетелдегі кейбір теміржол бағыттарында қолданылатыны айтылып, оны Қазақстанда да енгізу ұсынылды. Идея әсіресе жалғыз сапарға шығатын әйелдердің қауіпсіздігі тұрғысынан қолдау тауып отыр.

Ұсынысқа байланысты «Қазақстан темір жолы» компаниясына сұрақ қойылған. ҚТЖ өкілдері мұндай жүйені мамандар зерттеп жатқанын және оның кейін енгізілу мүмкіндігі қарастырылатынын хабарлады.

Бастама іске асса, жолаушылардың сапар кезіндегі жайлылығы мен қауіпсіздігіне қатысты таңдау мүмкіндігі артуы ықтимал. Алайда жаңа тәртіптің екінші жағы да бар: мысалы, бірге сапарға шығатын ерлі-зайыптылар, туыстар немесе достар бір купеден орын ала алмай қалуы мүмкін.

Сондай-ақ сұраныс жоғары бағыттарда бос орындарды тиімді бөлу мәселесі туындайды. Сондықтан жүйені енгізу тек қауіпсіздік тұрғысынан емес, билет сату тәртібі мен жолаушылардың нақты қажеттілігі ескеріле отырып бағалануы қажет.

Қазірше бұл — талқыланып жатқан ұсыныс. ҚТЖ оның нақты қашан және қандай бағыттарда енгізілетінін хабарлаған жоқ.