Жаңалықтар

Несие төлемін өткізіп алғандарға тағы 60 күн берілуі мүмкін

15.09.2026

мин

0

72

Сурет: Aikyn.kz

Қазақстанда бірнеше несиеге қатар кіріп кеткен азаматтардың берешегін реттеу тәртібін жеңілдету ұсынылып отыр. Жаңа ереже күшіне енсе, қарыз алушыға төлемді жабуға қосымша 60 күн беріледі, — деп хабарлайды Dauletten.kz.

Қазақстанда мерзімі өткен бірнеше несиені бір рәсім арқылы реттеу тәртібі өзгеруі мүмкін. Жаңа талаптар әсіресе екі немесе одан да көп кредитор алдында қарызы бар, кепілсіз тұтынушылық несие алған азаматтарға қатысты болмақ.

Қолданыстағы тәртіп бойынша бір несиенің төлемін өткізіп алу борышкер үшін қысымды күшейтсе, жаңа тәсіл қарызды бірден өндіріп алуға емес, азаматқа оны реттеуге уақыт беруге бағытталған.

Ең маңызды өзгерістің бірі — қосымша 60 күн. Егер қарыз алушы кезекті төлемін уақытында жасай алмаса, берешегін келесі төлем мерзіміне дейін өтеуге мүмкіндік алады. Ал осы кезеңде де қарыз жабылмаса, мерзімі өткен берешекті толық өтеу үшін тағы 60 күн беріледі.

Яғни, қаржылық қиындыққа уақытша тап болған азаматқа қарызын реттеуге қосымша мүмкіндік қарастырылмақ.

Бұл жерде тағы бір назар аударарлық мәселе бар. Қарызды өндіріп алу құқығын басқа ұйымға берген қаржы компаниялары да жаңа рәсімде кредитор ретінде есепке алынады. Демек, борышкердің әртүрлі ұйымдарға бөлініп кеткен қарыздарын бір ғана рәсім аясында қарау мүмкіндігі кеңейеді.

Азаматтың өтінішін банк немесе микроқаржы омбудсманы қарайды. Егер қарыз алушы белгіленген талаптарға сәйкес келсе, оның бірнеше кредитор алдындағы берешегін кешенді түрде реттеу мәселесі қаралады.

Тағы бір өзгеріс — кредиторлардың жауап беру мерзімі қысқарады. Бұған дейін өтінішке жауап беру үшін 5 жұмыс күні берілсе, жаңа тәртіпте бұл мерзім 3 жұмыс күніне дейін азайтылмақ.

Ал қарыз алушы төлеген қаражат кредиторлардың арасында оның берешек көлеміне қарай бөлінеді. Бұл бірнеше несиеге қарызы бар азаматтың бір кредиторға ғана төлем жасап, қалған қарыздарын назардан тыс қалдыру жағдайын азайтуға бағытталған.

Мұндағы негізгі өзгеріс — бірнеше несиесі бар азаматтың әр қарызын жеке-жеке шешуге емес, барлық берешегін бір рәсімде қарауға мүмкіндік берілуі. Бұл қарызды кейінге шегеру ғана емес, борышкер мен кредитор арасындағы келіссөзді бір жүйеге келтіру тетігі ретінде қарастырылып отыр.

Жаңа тәртіп 21 қыркүйектен бастап күшіне енеді деп жоспарланған.