Жаңалықтар

Қазақстанда бір ЖОО-дан екіншісіне ауысқанда грант сақтала ма?

03.02.2025

1 мин

0

926

Сурет: halyq-uni.kz

2023/2024 оқу жылында Қазақстанда 24 мыңнан астам студент бір жоғары оқу орнынан (ЖОО) екіншісіне ауысты. Мұндай жағдайда білім беру гранты сақтала ма? Қосымша төлем жасау қажет пе? Бұл сұрақтарға Dauletten.kz сайты жауап береді.

Студенттер нені білуі керек?

Ғылым және жоғары білім министрлігінің мәліметінше, студенттер бір білім беру бағдарламасынан екіншісіне немесе бір ЖОО-дан екіншісіне ауысуды тек жазғы және қысқы демалыс кезінде жүзеге асыра алады.

Бұл ретте келесі факторлар ескеріледі:

• Даярлық бағыты мен бағдарламаның бейіні,
• Студенттің үлгерімі және оқу жетістіктері,
• Академиялық адалдық нормаларын сақтау.

Сонымен қатар, шығармашылық дайындықты талап ететін бағдарламалардан басқа мамандықтарға ауысу үшін ҰБТ сертификаты қажет. Оның балы қабылдау талаптарында белгіленген ең төменгі шектен төмен болмауы тиіс. Сол сияқты, педагогикалық мамандықтарға ауысу да тек тиісті шекті балды жинаған жағдайда мүмкін болады.

- Жоғарыда көрсетілген талаптарға сай болған жағдайда, студент басқа ЖОО-ға ауысу туралы өтінішті демалыс кезінде ректордың атына жаза алады, – деп хабарлады министрлік.

Грант сақтала ма?

Министрліктің баспасөз қызметі бұл мәселе бойынша түсініктеме берді. Белгілі болғандай, грантты сақтау мүмкіндігі кейбір жағдайларға байланысты.

- Білім беру гранты бойынша оқитын студент басқа ЖОО-ға грантын сақтай отырып ауыса алады. Алайда, жекелеген ЖОО-ларға бөлінген грантпен оқуға түскендер мен педагогикалық мамандықтарға квота бойынша қабылданған студенттер басқа ЖОО-ға тек ақылы негізде ауыса алады, – деп мәлімдеді ведомство.

Сондай-ақ, басқа ЖОО-дан ұлттық университеттерге ауысқан студенттер, магистранттар және резидентура тыңдаушылары білім беру грантының айырмашылығын төлеуге міндетті.

- Ұлттық университеттердегі грант құны басқа ЖОО-ларға қарағанда жоғары. Сондықтан студенттер гранттың айырмашылық сомасын өтеуі қажет, – деп түсіндірді министрлік.

Министрлік студенттерді ауыстыру тәртібін белгілеу әр ЖОО-ның құзыретіне кіретінін еске салды. Университеттер өздерінің ауыстыру ережелерін әзірлеп, бекітеді және олардың орындалуын қадағалайды. Бұл ережелер 2018 жылы білім министрінің бұйрығымен бекітілген жоғары және жоғары оқу орнынан кейінгі білім беру ұйымдарының қызметін реттейтін нормаларға сәйкес жасалады.

Қажетті құжаттар тізімімен egov.kz порталында танысуға болады.