Қазақстанда медициналық қызметтердің ашықтығын арттыру мақсатында QR-код арқылы бақылауға мүмкіндік беретін Qalqan экожүйесін енгізу жоспарланып отыр. Үкімет басшысы жергілікті атқарушы органдар мен Денсаулық сақтау министрлігіне міндет жүктеп, МӘМС және ТМККК аясында жұмыс істейтін барлық медициналық ұйымдар 15 сәуірге дейін осы жүйеге қосылуы тиіс екенін тапсырды, - деп хабарлайды Dauletten.kz.

Жаңа жүйе пациенттерге қатысты барлық мәліметті бір жерде жинақтайды: көрсетілген қызметтер, емдеуге жатқызу, зертханалық талдаулар, дәрігер тағайындаулары, сондай-ақ медициналық шығындардың МӘМС пен ТМККК арасында қалай бөлінетіні көрініс табады. Сонымен қатар азаматтар анықталған сәйкессіздіктер туралы тікелей хабарлай алады.

Медициналық ұйымдар үшін Qalqan ресурстарды пайдалану, инфрақұрылым жағдайы, кадр жетіспеушілігі, қаржылық көрсеткіштер мен түрлі ауытқуларды талдауға мүмкіндік береді.

МӘМС қоры мамандарының бағалауынша, бұл жүйені енгізу нәтижесінде 200 млрд теңгеден астам экономикалық тиімділікке қол жеткізуге болады.