|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақстанда шағын бизнеске өсімпұлдар мен айыппұлдарды есептен шығару тәртібі бекітілді, - деп хабарлайды Dauletten.kz.
2026 жылғы 13 ақпанда Қаржы министрінің бұйрығымен микро және шағын кәсіпкерлік субъектілеріне қатысты өсімпұлдар мен айыппұлдарды есептен шығару қағидалары бекітілді. Құжат 2026 жылғы 1 қаңтардағы жағдай бойынша қалыптасқан салық берешектеріне қолданылады. Жаңа тәртіп кәсіпкерлерге негізгі қарызды өтеген жағдайда қосымша қаржылық жүктемеден босауға мүмкіндік береді.
Кімдер пайдалана алады?
Қағидалар микро және шағын кәсіпкерлік субъектілеріне арналған. Есептен шығару тек белгіленген талаптар толық орындалған кезде жүзеге асырылады.
Қандай берешектерге қатысты?
Есептен шығаруға мына сомалар жатады:
1. Өсімпұлдар:
2026 жылғы 1 қаңтардағы жағдай бойынша салық төлеушінің жеке шотында тұрған берешекке есептелген өсімпұл;
2026 жылғы 1 қаңтардан бастап негізгі қарыз төленген күнге дейін есептелген өсімпұл.
2. Айыппұлдар:
2026 жылғы 1 қаңтардағы жағдай бойынша салық салу саласындағы құқық бұзушылықтар үшін мемлекеттік кірістер органдары салған айыппұлдар;
Салықтық тексеру нәтижесінде есептелген және төлеу мерзімі 2026 жылғы 1 қаңтарға дейін белгіленген айыппұлдар;
2026 жылғы 1 қаңтарға дейін ҚҚС төлеуші ретінде тіркелмей жүзеге асырылған айналымдар үшін салынған айыппұлдар.
3. Төлеу мерзімі өзгертілген міндеттемелер бойынша:
Егер салық төлеуші 2026 жылғы 1 сәуірге дейін салық және бюджетке төленетін басқа да міндетті төлемдер бойынша міндеттемесін толық орындаса, осы берешектерге есептелген өсімпұлдар мен айыппұлдар да есептен шығарылады.
Негізгі шарт қандай?
Ең басты талап — кәсіпкер 2026 жылғы 1 қаңтардағы жағдай бойынша есептелген салық және басқа да міндетті төлемдер бойынша берешекті 2026 жылғы 1 қаңтар мен 31 наурыз аралығында толық өтеуі тиіс.
Берешек толық өтелмесе, өсімпұлдар мен айыппұлдар есептен шығарылмайды.
Есептен шығару қалай жүргізіледі?
Өсімпұлдар мен айыппұлдарды есептен шығару арнайы құрылған комиссия арқылы жүзеге асырылады.
Комиссия қағидалар күшіне енген күннен бастап екі жұмыс күні ішінде құрылады.
Оның құрамына салық есебі, тіркеу, берешекпен жұмыс, әкімшілік құқық бұзушылықтар, аудит, ҚҚС әкімшілендіру, дәрменсіз борышкерлермен жұмыс және заң қызметіне жауапты тұлғалар кіреді.
Комиссия 2026 жылғы 31 наурызға дейін жеке шоттарды түгендеп, берешекті толық өтеген салық төлеушілерді анықтайды.
Шешім қабылданғаннан кейін үш жұмыс күні ішінде өсімпұл сомасы салық төлеушінің жеке шотынан есептен шығарылады.
Қандай жағдайларда есептен шығарылмайды?
Мына сомалар бұл тәртіпке кірмейді:
Кәсіпкерлік қызметке қатысы жоқ жеке тұлғалардың салық міндеттемелері бойынша өсімпұлдар;
Кәсіпкерлік қызметке байланысты емес құқық бұзушылықтар үшін жеке тұлғаларға салынған айыппұлдар.
Маңызы неде?
Жаңа қағидалар шағын және микро бизнеске жиналып қалған өсімпұлдар мен айыппұлдардан құтылуға мүмкіндік береді. Алайда басты талап өзгермейді — негізгі салық берешегі толық өтелуі тиіс.
