Жаңалықтар

Құрылтай сайлауына 34,3 млрд теңге бөлінді: жеті партия 546 кандидатты ұсынды

14.07.2026

мин

0

91

Сурет: Masa Media

Қазақстандағы жаңа саяси жүйенің алғашқы ірі сынағы басталды. Құрылтай сайлауына қатысатын кандидаттарды ұсыну кезеңі аяқталып, жеті саяси партия жаңа парламенттегі орындарға 546 үміткерді қосты. Енді елдегі алғашқы бір палаталы парламенттің құрамын айқындайтын саяси дода қыза түспек, — деп хабарлайды Dauletten.kz.

Орталық сайлау комиссиясына Қазақстанда ресми тіркелген барлық жеті саяси партия өз кандидаттарының тізімін тапсырды. Осылайша, Құрылтайдың алғашқы сайлауына қатысатын үміткерлердің толық құрамы белгілі болды.

Жалпы саны 546 кандидат жаңа парламенттегі орындарға таласады. Олардың ішінде ең көп үміткерді «Әділет» партиясы ұсынды. Партия тізіміне 186 адам енгізілген. Одан кейін Respublica партиясынан – 76, Қазақстан Халық партиясынан – 72, «Ауыл» партиясынан – 69, «Ақ жолдан» – 63, «Байтақтан» – 47 кандидат ұсынылды. Ал ең қысқа тізімді Жалпыұлттық социал-демократиялық партия ұсынып, 33 кандидатты тіркеді.

Бұл жолы сайлауға елдегі барлық ресми тіркелген саяси партия қатысады. Сарапшылар мұны жаңа парламенттің құрамын қалыптастырудағы маңызды кезеңдердің бірі деп бағалайды. Ендігі кезекте кандидаттар сайлауалды үгіт-насихат жұмыстарын жүргізіп, сайлаушылардың сеніміне ие болуға тырысады.

Сонымен қатар Орталық сайлау комиссиясы халықаралық байқаушыларды аккредиттеу рәсімін бастады. Қазіргі уақытта үш халықаралық ұйым мен төрт мемлекеттен келген 60 байқаушының құжаттары қабылданған. Олардың басым бөлігі – ЕҚЫҰ-ның Демократиялық институттар және адам құқықтары жөніндегі бюросының миссиясы өкілдері. ОСК төрағасының орынбасары Мұхтар Ерманның айтуынша, жаңа өтінімдер түскен сайын аккредиттелген байқаушылардың тізімі жаңартылып отырады.

Еске салайық, Құрылтай сайлауы 23 тамызда өтеді. Оның қорытындысы бойынша Қазақстан тарихындағы алғашқы бір палаталы парламенттің құрамы жасақталады. Үкімет сайлауды ұйымдастыруға резервтен 34,3 миллиард теңге бөлген. Сондықтан бұл науқан елдің жаңа саяси моделін қалыптастырудағы ең маңызды оқиғалардың бірі саналады.