Жаңалықтар

TikTok-тың жаңа жоспары белгілі болды: қолданушылар ақша аудара алады

19.08.2026

мин

0

187

TikTok әлеуметтік желісінде қолданушыларға жеке хабарлама арқылы бір-біріне ақша аударуға мүмкіндік беретін жаңа функция әзірленіп жатыр. Жаңа мүмкіндік платформаның қаржы қызметтерін кеңейту жоспарының бір бөлігі болуы мүмкін, — деп хабарлайды Dauletten.kz.

TikTok қолданушылары жақын уақытта мессенджер арқылы ғана емес, ақша аудару үшін де платформаны пайдалана алуы мүмкін. Қосымшаның жасырын кодынан тікелей төлем жасауға арналған жаңа функцияның белгілері табылған.

Кодтан TikTok Pay жүйесіне қатысты элементтер, аударымды бір рет басу арқылы растау және төлемге мәтіндік түсініктеме қосу мүмкіндігі анықталған. Бұл функция іске қосылса, қолданушылар жеке хат алмасу кезінде бір-біріне тікелей ақша жібере алады.

Мәселен, бір адам досына қарызын қайтару немесе белгілі бір тауардың ақысын төлеу үшін TikTok-тан шықпай-ақ ақша аудара алады. Яғни әлеуметтік желі біртіндеп тек контент көруге арналған платформа емес, күнделікті қаржылық операциялар жасалатын цифрлық ортаға айналуы мүмкін.

TikTok-тың төлем жүйесі қазірдің өзінде Оңтүстік-Шығыс Азияның кейбір елдерінде жұмыс істейді. Атап айтқанда, Вьетнам, Малайзия және Таиландта TikTok Pay негізінен TikTok Shop арқылы жасалған сатып алулардың ақысын төлеу үшін қолданылады.

Жеке адамдар арасында ақша аудару функциясының пайда болуы компанияның қаржы нарығындағы ауқымын кеңейтуі ықтимал. Бұл ретте TikTok әлеуметтік желі, онлайн сауда және төлем қызметтерін бір платформаға біріктіруге ұмтылып отыр.

Мұндай тәсіл әлемде бұрыннан бар. Мәселен, WeChat пен WhatsApp платформаларында да ақша аударуға мүмкіндік беретін қаржылық қызметтер іске қосылған.

Дегенмен TikTok жаңа функцияның қашан қолжетімді болатынын әзірге ресми түрде хабарлаған жоқ. Қосымшаның кодынан табылған мәлімет оның әзірленіп жатқанын көрсеткенімен, компания функцияны кез келген уақытта өзгертуі немесе іске қоспауы да мүмкін.

Егер жаңа мүмкіндік пайдаланушыларға ұсынылса, TikTok-тағы қарапайым жеке хаттың өзі ақша аударуға арналған құралға айналмақ. Бұл әлеуметтік желінің тек ойын-сауық платформасы болудан алыстап, сауда мен қаржыны біріктіретін экожүйеге айналу бағытын көрсетеді.