Товарные рынки | ||
BID | ASK | |
Brent | 0.00 | 0.00 |
Лайт | 0.00 | 0.00 |
Мемлекет басшысы Қасым-Жомарт Тоқаев Presight.AI компаниясының басқарма төрағасы Томас Прамотедхамды қабылдады, - деп хабарлайды Dauletten.kz Ақордаға сілтеме жасап.
Кездесу барысында Қазақстанда жоғары өнімді есептеу жүйелерін дамыту, цифрлық трансформация және озық технологияларды енгізу бағытындағы ынтымақтастықты күшейту мәселелері қарастырылды. Президент цифрлық инфрақұрылымды дамыту маңызды екенін атап өтіп, елімізде суперкомпьютер кластерін құру стратегиялық мәнге ие екенін айтты.
Томас Прамотедхам Қасым-Жомарт Тоқаевқа осы жобаның жүзеге асырылу барысы жөнінде баяндады. Сондай-ақ технологияны локализациялау және қазақстандық компанияларды бірлескен жобаларға тарту мәселелеріне ерекше назар аударылды. Presight.AI басшысы отандық IT-компаниялардың жоғары біліктілігін атап өтіп, олармен ұзақмерзімді серіктестікке ниетті екенін жеткізді.
Астана әкімдігімен бірлесіп жүзеге асатын Smart City жобасы да талқыланды. Мемлекет басшысы қала инфрақұрылымын басқаруда жасанды интеллект шешімдерін қолдануға қолдау білдірді. Атап айтқанда, AlemAI халықаралық жасанды интеллект орталығының базасында қала қызметтерінің тиімділігін арттыруға бағытталған ахуал орталығын құру жоспарланып отыр.
Қасым-Жомарт Тоқаев еліміздің цифрлық трансформациясы мен технологиялық дамуына ықпал ететін бастамалар бойынша ынтымақтастықты жалғастырудың маңыздылығын атап өтті.