Жаңалықтар

Вице-президент кім болады? Тоқаев жауап берді

23.08.2026

мин

0

339

Бүгін Мемлекет басшысы Қасым-Жомарт Тоқаев Құрылтай сайлауына қатысып, дауыс берді. Президент бұдан бөлек, жаңа вице-президенттің тағайындалуы, алдағы президенттік сайлау және жаңа Құрылтай депутаттарына қойылатын талаптар жөнінде пікір білдірді, — деп хабарлайды Dauletten.kz.

Қасым-Жомарт Тоқаев жаңа вице-президенттің кім болатыны алдағы бір апта немесе он күн ішінде белгілі болатынын айтты. Оның сөзінше, қазіргі жағдайда бұл қызмет ел үшін қажет. Президент бұл лауазымға нақты кім келетінін қазір анық айта алмайтынын жеткізді. Сонымен қатар Қазақстан Халық Кеңесі Ассамблеяның жұмысын жалғастырып қана қоймай, жаңа саяси механизм ретінде қызмет ететінін айтты.

Тоқаевтың қайта сайлануына қатысты нақты шешім әзірге жоқ

Президент Конституциялық соттың шешіміне сәйкес қайта сайлануға заңды құқығы бар екенін растады. Алайда келесі президенттік сайлауға қатысу-қатыспауы және оның қашан өтетіні туралы айтуға әлі ерте екенін жеткізді. Тоқаев қазіргі уақытта ел алдында тұрған міндеттерді орындау маңызды екенін айтты. Сондай-ақ Ұлттық қор қаражатын халық игілігіне, соның ішінде әлеуметтік нысандар салуға пайдалануды қолдайтынын білдірді.

Тоқаев жаңа Құрылтай депутаттарынан не күтеді?

Президент жаңа Құрылтай депутаттары үш бағыт бойынша жауапкершілік алуы керек екенін айтты. Олар қабылданатын заңдардың сапасына, сайлаушыларға берген уәделері мен бағдарламаларының орындалуына және елдің дамуына бағытталған заңдарға жауапты болуы тиіс. Тоқаев жастардың мемлекеттік басқаруға белсенді араласуы маңызды екенін атап өтті. Оның айтуынша, қазіргі күрделі кезеңде елдің бірлігі мен Қазақстанды дамытуға ортақ күш жұмсау қажет.