Жаңалықтар

Yandex Go-дың істен шығуына не себеп – министрлік түсіндірді

12.10.2026

мин

0

259

Сурет: Tizgin.kz

Қазақстанда Yandex Go сервисінің жұмысы бұзылғаннан кейін министрлік платформаның техникалық инфрақұрылымына қатысты түсініктеме берді, — деп хабарлайды Dauletten.kz.

Ведомство пайдаланушылардың жеке деректері елдегі серверлерде сақталатынын растады. Дегенмен такси мен жеткізу қызметтерінің жұмысына қажетті кейбір жүйелер шетелде орналасқан.

Қазақстанда Yandex Go сервисінің жұмысында ақау тіркеліп, платформаның техникалық тұрақтылығы мәселесі күн тәртібіне шықты. Осыған байланысты Жасанды интеллект және цифрлық даму министрлігі мәлімдеме жасап, серверлердің орналасуы мен сервистің жұмысына қатысты түсініктеме берді.

Ведомствоның хабарлауынша, қазақстандық пайдаланушылардың дербес деректерін сақтауға арналған серверлер ел аумағында орналасқан. Қазіргі уақытта олар қалыпты режимде жұмыс істеп тұр.

Алайда министрлік деректер сақталатын серверлердің Қазақстанда болуы платформаның барлық технологиялық жүйесі де ел ішінде орналасқанын білдірмейтінін атап өтті. Атап айтқанда, такси шақыру және тапсырыстарды жеткізу қызметтерінің жұмысына қажет кейбір компоненттер шетелдік инфрақұрылымға тәуелді.

- Қазақстандық пайдаланушылардың дербес деректерін сақтауға арналған серверлер ел аумағында орналасқан және қалыпты режимде жұмыс істеп тұр. Алайда бұл платформаның барлық бөлігі өз алдына дербес жұмыс істейді дегенді білдірмейді. Такси және жеткізу қызметтеріне қажетті жекелеген компоненттер Қазақстан аумағынан тыс жерде орналасқан, – делінген министрлік мәлімдемесінде.

Министрлік деректерді ел аумағында сақтау мен сервистердің үздіксіз жұмысын қамтамасыз ету екі түрлі міндет екенін түсіндірді. Сондықтан серверлердің қалыпты жұмыс істеуі платформаның барлық функциясы еш кедергісіз орындалады дегенді білдірмейді.

Қазір «Яндекс» компаниясы сервистердің жұмысын қалпына келтіру бойынша шаралар жүргізіп жатыр. Министрлік те компаниямен және Қазақстандағы инфрақұрылымдық ұйымдармен бірлесіп жұмыс істеуде.

Сонымен бірге ведомство жүктеме артқан жағдайда басқа такси және жеткізу платформаларының тұрақты жұмыс істеуіне бағытталған шаралар қабылданып жатқанын хабарлады.

«Яндекс» серверлері Қазақстанға қашан көшірілді?

2023 жылы сол кездегі Цифрлық даму министрі Бағдат Мусин «Яндекс» серверлерінің Қазақстанға көшірілгенін мәлімдеген болатын. Сол кезде министрлік yandex.kz порталының серверлері ел аумағына орналастырылғанын хабарлаған еді.

Yandex Go жұмысы неге бұзылды?

11 қазанда Қазақстанда Yandex Go сервисінің жұмысында техникалық ақау тіркелді. Осы оқиға Ресейдегі «Яндекс» дата-орталықтарына дрон шабуылдары жасалғаны туралы хабарлармен тұспа-тұс келді.

Алайда екі оқиғаның арасында тікелей байланыс бары ресми түрде расталған жоқ. Қазіргі уақытта Қазақстандағы сервистің жұмысына кедергі келтірген нақты себеп туралы түпкілікті қорытынды жасауға жеткілікті ресми ақпарат жарияланбады.