Тоқаев: Үкіметтің ұсынған ҚҚС мөлшерлемесі шамадан тыс жоғары
07.02.2025
1 мин
0
354
Мемлекет басшысы отандық бизнес өкілдерімен кездесуде Үкіметке қосымша құн салығына қатысты мәселені қайта қарауды тапсырды, - деп хабарлайды Dauletten.kz.
- Кез келген реформа жан-жақты сараланып, байыппен жүзеге асырылуы тиіс. Экономиканың әр саласының ерекшеліктерін ескере отырып, түрлі нұсқалар қарастырылуы керек. Бұған дейін ҚҚС бойынша жеке пікірімді білдірмедім, себебі қызметтік мәртебеме байланысты әрбір сөзім нақты тапсырма ретінде қабылданады. Дегенмен, бұл мәселеге қатысты көзқарасымды жеткізгім келеді. Қосымша құн салығының мөлшерлемесі мұқият сарапталып белгіленуі қажет. Үкімет бұл шешімді білікті сарапшылардың, кәсіпкерлердің және, әрине, депутаттардың пікірін ескере отырып, нақты есептеулер негізінде қабылдағаны жөн. Бір нәрсе анық – қазіргі ұсынылып отырған ҚҚС мөлшерлемесі тым жоғары. Сіздер нақты деректерді атадыңыздар, қоғам бұл мәселені қызу талқылады, тіпті артық сөздер де айтылды. Бірақ бұл – алдын ала ұсынылған бастама. Сондықтан Үкіметтің жұмысы бизнес, қоғам, сарапшылар мен кәсіпкерлердің пікірін ескере отырып жалғасуы керек. Биыл нақты шешім қабылдануы тиіс. Мен бұған дейін де айттым: Үкімет бұл мәселені депутаттармен және сарапшылармен жан-жақты талқылауы қажет. Бүгінгі пікірлер де міндетті түрде ескеріледі. Мемлекетке оңтайлы шешім керек – бір жағынан, бизнеске қолайлы жағдай жасап, екінші жағынан, салық тәртібін күшейтіп, бюджет кірісін арттыратын тиімді жол табу маңызды, – деді Қасым-Жомарт Тоқаев.
