Жаңалықтар

Ұлттық банк Парламенттің 30 жылдығына арналған ерекше күміс монетаны сатылымға шығарды

09.07.2026

мин

0

64

Сурет: Ұлттық банк

Қазақстанда Парламенттің 30 жылдығына арналған коллекциялық күміс монета айналымға шығады. Алтын жалатылған ерекше монета небәрі 1 мың данамен шығарылып, 10 шілдеден бастап сатылымға ұсынылады, — деп хабарлайды Dauletten.kz.

Қазақстанның Ұлттық банкі Парламенттің 30 жылдығына арналған жаңа коллекциялық монетаны 10 шілдеден бастап интернет-дүкен арқылы сатылымға шығарады.

Ерекше монета күмістен дайындалғанымен, оның бетіне алтын жалатылған. Монетаның массасы – 24 грамм, диаметрі – 37 миллиметр. Ол жоғары сапалы proof технологиясымен соғылған.

Коллекциялық монетаның номиналы – 1000 теңге. Барлығы небәрі 1 мың дана ғана шығарылған. Мұндай шектеулі таралым монетаның коллекционерлер үшін құнын арттыра түседі.

Жаңа шығарылым Қазақстан Парламентінің құрылғанына 30 жыл толуына орай әзірленді. Биыл еліміздің заң шығару қызметін жүзеге асыратын жоғары өкілді органы – Парламент өзінің мерейтойын атап өтіп жатыр.

Монетаның реверсінде Сенат пен Мәжіліс ғимараттары бейнеленген. Сондай-ақ дизайнда Мәжіліс залының орталық бөлігіндегі еденнің ұлттық ою-өрнегінен алынған композициялық элемент қолданылған. Төменгі бөлігінде Парламенттің құрылған жылы мен 30 жылдық мерейтойының датасы көрсетілген.

Соңғы жылдары Ұлттық банк тарихи тұлғалар мен маңызды мемлекеттік оқиғаларға арналған коллекциялық монеталарды тұрақты түрде шығарып келеді. Мұндай өнімдер тек төлем құралы ғана емес, ел тарихын, мәдениеті мен мемлекеттік институттарының қалыптасуын дәріптейтін нумизматикалық құндылық ретінде де бағаланады.

Айта кетейік, бұған дейін Ұлттық банк қазақ опера өнерінің көрнекті өкілі Ермек Серкебаевтың құрметіне де арнайы коллекциялық монета шығарған.