Қаржылық сауат

Зейнетақы жарнасын қалай тексереміз?

18.08.2020

1 мин

130

44392

Ай сайын алатын жалақыңыздың оннан бір бөлігі Бірыңғай жинақтаушы зейнетақы қорына аударылатынын білесіз бе? Жұмыс берушіңіздің зейнетақы жарнасын уақытылы аударып жүргеніне көз жеткізіп көрдіңіз бе? Жауабыңыз «жоқ» болса, бұл мақаладан аларыңыздың бары анық.

Зейнетақы қорына аударылып жатқан әр айдағы жалақының 10 пайызы туралы ақпарат зейнетке шығатын жасқа келгендерге ғана емес, жастарға да қатысты. Сондықтан:

• алдымен жұмыс беруші мен жұмыскер арасында жасалатын шартта аталған жарнаның ай сайын аударылатыны нақты көрсетілуін ескеру керек;
• екіншіден, зейнетақы шотындағы қаражатты тексеріп отырудың маңызын түсінген дұрыс. Өйткені зейнетақы жарналары туралы ақпаратты уақытылы алып отырмасаңыз, жарна түсіп-түспегенін білмей, желініп қалуыңыз мүмкін.

Зейнетақы жарналарын онлайн тексерудің қандай жолдары бар?

1. Зейнетақы аударымдарын жеке кабинетке кіру арқылы тексеру 

Қазақстанның зейнетақы қорының әрбір бөлімшесі ресми түрде «Зейнетақы жинақтарының жай-күйі туралы ақпарат беру» деп аталатын қызметті ұсынады. Алайда зейнетақы жинағы туралы ақпаратты онлайн түрде де алуға болады. БЖЗҚ-ның интернет арқылы алынған үзінді-көшірмесі электрондық қолтаңбамен куәландырылатындықтан, қор бөлімшесіне өзіңіз барып алған үзінді-көшірмеден еш айырмашылығы болмайды.

Google Chrome, Mozilla Firefox, Opera сияқты браузерлерден БЖЗҚ сайты немесе Android, iOS және Windows Phone арқылы жүктелген зейнетақы қорының мобильді қосымшасы арқылы жеке кабинетке кірсеңіз, онлайн түрде ұсынылатын қор қызметтеріне оңай қол жеткізуге болады.

Ол үшін жеке кабинетке электрондық цифрлық қолтаңба (ЭЦҚ) немесе ЖСН мен парольді тіркеу арқылы кіру қажет. Жеке кабинетке кірген соң «Зейнетақы жинақтарының жай-күйі туралы ақпарат беру» қызметі автоматты түрде ұсынылады. Әдетте анықтамадағы жарналар туралы мәліметтер соңғы 12 айға беріледі. Бірақ кез келген басқа кезеңді де сұрата аласыз.

2. Зейнетақы аударымдарын электрондық пошта арқылы біліп отыру  

Зейнетақы қорынан зейнетақы жарналары туралы үзінді электрондық мекенжайыңызға келуін де сұратуға болатын қызмет бар. Ол үшін www.enpf.kz-ке кіріп, жоғарғы жолда «Электрондық қызмет көрсету» батырмасын басыңыз.

Шыққан қызметтер тізімінің сол жағында тұрған «Жеке зейнетақы шотынан үзінді көшірмені e-mail арқылы алу» қызметін таңдаңыз. Қызметті алуды мақұлдап, ЖСН мен e-mail-іңізді және үзінді көшірмені алғыңыз келетін кезеңді көрсетіңіз. Содан соң «Жіберу» түймесін басып, экранда сұралған құжат сіздің электрондық поштаңызға жіберілгенін көресіз.

Сонымен қатар зейнетақы қорындағы жинақтарды ЭЦҚ арқылы Egov.kz порталынан және Telegram-дағы  Egovkzbot арқылы да білуге болады.  

Жансая ҚАМБАР