|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақстанда тағы бір санаттағы қызметкерлердің жалақысы көтеріледі. Бұл туралы вице-премьер, Ұлттық экономика министрі Нұрлан Байбазаров мәлімдеді, - деп хабарлайды Dauletten.kz.
Оның айтуынша, 2025 жылдан бастап ғылыми ұйымдар қызметкерлерінің лауазымдық айлықтары 17 пайызға артады.
- Ғылыми ұйымдар қызметкерлерінің лауазымдық айлықтары биыл 18 пайызға артты, ал 2025 жылдың қаңтарынан бастап тағы 17 пайызға өседі. Үкімет инвестицияларды ынталандыру және экономиканы әртараптандыру бойынша жоспарланған шараларды іске асыруды жалғастырады, – деді Нұрлан Байбазаров үкіметтегі брифингте.
Вице-премьер елде мұнай-газ химиясы, машина жасау, металлургия және агроөнеркәсіп салаларында 17 ірі жоғары технологиялық жобаның жүзеге асырыла бастағанын атап өтті.
- Экономикаға ірі көлемде инвестициялар салынуда. Биыл Мемлекет басшысының ауқымды бастамаларын (тұрғын үй құрылысы, өңірлерді газдандыру, ТКШ-ны жаңғырту, көлік инфрақұрылымы) жүзеге асыру аясында экономикаға 2 триллион теңгеден астам қаржы бөлінді, – деді ол.
Сондай-ақ, биыл 2029 жылға дейінгі ұлттық инфрақұрылымдық жоспар іске асырыла бастады, оның жалпы сомасы шамамен 40 триллион теңгені құрайды. 2024 жылдың соңына дейін энергетика және коммуналдық секторды жаңғырту жөніндегі ұлттық жоба қабылданады.
- Фермерлерді қолдау жалғасады. Келесі жылы ауыл шаруашылығын дамытуға қаржыландыру 700 миллиард теңгеге дейін ұлғайтылды. Қазіргі уақытта фермерлерден өтінімдер қабылдануда. Біздің экономикаға шетелдік капитал тарту жұмыстары күшейтілді. Бизнес үшін қолайлы жағдай жасау және экономиканы либерализациялау бойынша жүйелі жұмыс жалғасады, – деп қосты Байбазаров.
Үкімет мемлекеттік бағдарламаларды жүзеге асырудан келетін шетел валютасының ағыны валюта нарығын тұрақтандыруға және экономиканың әрі қарай өсуіне ықпал етеді деп күтуде.
Тағы көру
