|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Алматы полициясы қазақстандықтарға әлеуметтік желілерде өздерінің сапарлары жайлы жазбауға кеңес береді, - деп хабарлайды Dauletten.kz.
Алматы қаласы полиция департаментінің ресми өкілі Салтанат Әзірбектің айтуынша, бұл ақпаратты қаскөйлер пайдаланып кетуі мүмкін.
- Қылмыскерлер әлеуметтік желілерді жақсы бақылайды, олар әлеуметтік желілерді жақсы түсінеді және қай парақшаларды бақылау керектігін біледі. Мысалы, медиа немесе танымал тұлға: ‘Біз 10 күнге демалысқа кетіп қалдық’, деп Таиландқа отбасымен кеткенін жазса, бұл қылмыскер үшін дерлік хабарландыру іспетті: үйде ешкім жоқ, кілт кілемшенің астында, сейф шкафтың ішінде. Ақпараттық қауіпсіздік ережелерін әрдайым сақтау қажет, – деді Әзірбек Алматы қаласының Өңірлік коммуникациялар қызметіндегі брифингте.
Сондай-ақ ол пәтердің кілтін көршілерге қалдырудың да жақсы идея емес екенін ескертті.
- Кілтті көршілерге бұрынғыдай қалдырып, гүлдерге су құйып, үй жануарларын тамақтандыруды сұрау мүлдем дұрыс емес. Сақтық шараларын сақтау қажет. Егер пәтер, мысалы, төменгі қабатта орналасқан болса, терезелерді торлармен жабдықтаңыз. Пәтерді қарапайым сигнализация жүйесіне қосуға болады. Алдын ала қауіпсіздік шаралары сіздің мүлкіңізді қорғауға көмектеседі. Ешқандай жағдайда әлеуметтік желілерді хабарландыру тақтасы ретінде пайдалануға болмайды, – деп түйіндеді Әзірбек.
Алматы полициясының ресми өкілі 31 желтоқсан мен 4 қаңтар аралығында қалада 65 қылмыс тіркелгенін, олардың басым көпшілігі мүліктік және тұрмыстық сипатта болғанын мәлімдеді. Олардың 42-сі “ізін суытпай” ашылған. Сонымен қатар мереке күндері 200-ден астам әкімшілік құқық бұзушылық анықталып, тоқтатылған.
Жалпы алғанда, оңтүстік астанада Жаңа жыл мерекесі тыныш өтті. Қоғамдық тәртіпті қамтамасыз ету үшін Алматыда мереке күндері 3 мыңнан астам полицей жұмылдырылды. Қызметтердің жеке құрамы күшейтілген қызмет көрсету режиміне ауыстырылды.
