|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Астанадағы «Экомед» орталығында «Аңсаған сəби» бағдарламасының көмегімен ата-ана атанған отбасылар мен 100-ден астам кішкентай бүлдіршіндердің қатысуымен фестиваль өтті, деп хабарлайды Dauletten.kz порталы.
Фестивальге жиналған қонақтарға балаларды ерте дамыту мамандары кеңес беріп, психологпен əртүрлі трансформациялық ойындар өткізілді. Сондай-ақ кішкентай сəбилердің тұсауы кесілді.
Шара ұйымдастырушылары «Аңсаған сəби» квотасы бойынша үш жыл аралығында жалпы саны 6 554 квотаны игерген. 3 540 (54%) пациент жүктілік бойынша есепке тұрған. 2 487 (38%) сəби дүниеге келген.
«Экомед Астана» орталығы танымал тележурналист Лəйлə Сұлтанқызы құрылтайшысы болған «Mariyam қайырымдылық қорымен тығыз серіктестік байланыста. Президент телерадиокешеніне қарасты «Жібек жолы» телеарнасынан көрерменге жол тартқан «Ана болғым келеді» бағдарламасы аясында 30-ға жуық отбасылық жұпқа тегін ЭКҰ емшарасы жасалған. Бүгінде жоба аясында 9 cəби дүниеге келді, 12 келіншектің аяғы ауыр, 8 жұп кезекті эмбрион тасымалына дайындық үстінде.
«Аталмыш фестивальді ұйымдастыру тікелей ЭКҰ əдісінің көмегімен ата-ана атанған ел азаматтарының бастамасы. Біз тек игі бастаманың ұйымдастырушысымыз. Мемлекеттің атқарып жатқан оң істерінің жемісін көрсетуді əдемі мерекенің қарсаңында ұйымдастыруды жөн санадық», - деді Ләйлә Сұлтанқызы.
Айта кетейік, Мемлекет басшысы Қасым-Жомарт Тоқаев Үкіметке 2021 жылдан бастап «Аңсаған сəби» арнайы бағдарламасын іске қосуды тапсырған болатын. Нəтижесінде, экстракорпоральды ұрықтандыруға бөлінетін квотаның саны 7 мыңға дейін артқан. Осылайша, мыңдаған отбасы бала сүю бақытына ие болуда.
ҚР Денсаулық сақтау министрлігінің мəліметі бойынша: мемлекеттік квотаның көмегімен 2021-2023 жылдар аралығында 21 000 пациентке ЭКҰ жасалып, олардың 8 000 жүктілік бойынша есепке тұрған, 7 000 сəби дүниеге келген.
