Жаңалықтар

Атырауда 35 млн теңгеге жуық қаржы жымқырған бас бухгалтер сотталды

12.11.2026

0 мин

0

113

Сурет: ЖИ

Атырауда «ҚазАвтоЖол» АҚ еншілес ұйымының бас бухгалтері 34,8 млн теңге жымқырғаны үшін бес жылға бас бостандығынан айырылды, - деп хабарлайды Dauletten.kz Бас көлік прокуратурасына сілтеме жасап.

Атырау көлік прокуратурасы Экономикалық тергеп-тексеру департаментімен бірлесіп жүргізген тексеру барысында «ҚАЖсервис» ЖШС филиалының қаражатын жымқыру дерегін анықтаған.

Тергеу барысында бас бухгалтердің заңсыз төлемдер есептеп, ұйым қаражатын өзінің жеке банктік шотына аударып отырғаны белгілі болды. Осылайша кәсіпорынға 34,8 млн теңге көлемінде материалдық залал келтірілген.

Аталған дерек бойынша сотқа дейінгі тергеп-тексеру жүргізіліп, іс сотқа жолданған.

Атырау қаласының №2 сотының үкімімен бас бухгалтер кінәлі деп танылып, бес жылға бас бостандығынан айырылды. Сонымен қатар оған бес жыл бойы материалдық жауапкершілікпен байланысты қызмет атқаруға тыйым салынды.

Сот «ҚАЖсервис» ЖШС-нің келтірілген материалдық залалды өндіріп алу туралы азаматтық талап арызын толық көлемде қанағаттандырды.

Айта кетейік, сот үкімі әзірге заңды күшіне енген жоқ.