|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Әзербайжан әуе жолдарының (AZAL) J28243 рейсімен Бакуден Грозныйға ұшып бара жатқан ұшақ Қазақстанның Ақтау қаласы маңында апатқа ұшырады. Сол рейстің жолаушысы Субхонкул Рахимов болған жағдайды баяндап, экипаждың әрекеттеріне тоқталды, - деп хабарлайды Dauletten.kz.
Рахимов – Тәжікстанда туған, бірақ соңғы 24 жыл бойы Ресейде тұрып, сол елдің азаматтығын алған. Оның айтуынша, ұшақ апатқа дейін біршама уақыт тұрақсыз ұшып, кейін апатты жағдайда қонуға тырысқан.
– Ұшақ биікке көтеріліп, астыңғы жағында тұман байқалды. Мен ұшақ қайта айналып, қонбақшы деп ойладым, – дейді ол.
Рахимовтың пайымдауынша, ұшқыш ұшақты басқаруға тырысқан, бірақ жарылыстан кейін жағдай қиындап кеткен. Ұшақ шайқалып, теңселіп, бір деңгейде тұрақтап ұша бастаған.
– Кейін теңіз көрінді, ауа райы ашылды, бірақ ұшақ бақылаусыз қалғандай болды, – деп еске алады ол.
Апат кезінде жолаушылар қатты қорқып, дұға оқыған. Рахимовтың өзі де креслода отырып намаз оқығанын айтты.
Ұшақ жерге соғылғанда Рахимов есінен танбаған, бірақ бірнеше рет соққы алғанын еске түсірді.
– Көз алдымда от пен сарғылт жалын көрінді. Барлығы бірнеше секундта болды. Сосын тып-тыныш болып қалды. Тірі қалғаныма таңғалдым, – дейді ол.
Оның айтуынша, ұшақ құлағаннан кейін артқы бөлігі бөлініп кеткен. Рахимов 39-орында, ұшақтың артқы жағында отырған.
Сондай-ақ ол бортсеріктердің батылдығына ерекше тоқталды.
– Бір стюардесса соңына дейін жолаушыларды тыныштандыруға тырысты. Оның алаңдаулы, бірақ батыл дауысы есімде қалды. Ол өз міндетін толық орындады, – деді ол.
Апаттан кейін Рахимов қауіпсіздік белдігін шешіп, сыртқа шыққан. Бортсеріктердің жараланғанын, ал біреуінің ес-түссіз халде болғанын айтты. Ол қосалқы есікті іздеп, екі қысылып қалған әйелге көмектесуге тырысқан, бірақ қолынан келмеген.
Соңында Рахимов қазақстандық биліктің жедел көмек көрсеткеніне алғысын білдірді. Жолаушыларға ауруханада медициналық көмек көрсетіліп, вице-министрдің келгенін ерекше атап өтті.
