Жаңалықтар

Астанадағы әскери шеруге бөлінген 2,5 млрд теңге қайда жұмсалады?

26.03.2025

1 мин

1

365

Сурет: ktk.kz

Қорғаныс министрінің орынбасары Шайх-Хасан Жазықбаев Астанада өтетін әскери шеруге бөлінген 2,5 млрд теңгенің нақты қайда жұмсалатынын түсіндірді, - деп хабарлайды Dauletten.kz.

Шайх-Хасан Жазықбаевтың айтуынша, бұл қаражат жанар-жағармайға, тасымалдауға, әскери қызметшілердің тамағы мен киімін тігуге жұмсалады.

– Негізі, әскер өз орнына орналасқан күннің өзінде де жауынгерлік даярлыққа қаражат бөлінеді, – деді Жазықбаев Ulysmedia тілшісіне.

Еске салайық, Қорғаныс министрлігі Жеңістің 80 жылдығына орай әскери шеру өткізетінін хабарлаған болатын. Бұл шараға 2,5 млрд теңге қарастырылған.

Қорғаныс министрлігінің тәрбие және идеологиялық жұмыс департаменті басшысының орынбасары Виталий Адамовичтің мәлімдеуінше, әскери шеру 7 мамырда Астанадағы Тәуелсіздік алаңында, "Қазақ Елі" монументінің алдында өтеді. Шара үш кезеңнен тұрады:

1. Жаяу әскер саптарының шеруі: тарихи және заманауи бөлімдерден тұрады.
2. Механикаландырылған колонналардың өтуі: бұл кезеңде де тарихи және заманауи бөлімдер қамтылады.
3. Әуе шеруі: авиацияның көрінісі ұсынылады.

Биылғы шерудің басты ерекшеліктері:

• Ұлы Отан соғысы кезіндегі әскери формада сап түзеу.
• Қазақ жерінде құрылған әскери бөлімдердің жауынгерлік тулары алғаш рет алаңнан алып өтіледі.
• Музейде сақталған Жеңіс туының көшірмесі Т-34 танкінде көрсетіледі.
• Қазақстан Қорғаныс министрлігінің арнайы парадтық бөлімі Мәскеуде өтетін парадқа қатысады, ал Минскіге бес адамнан тұратын ту тобы жіберіледі.