Жаңалықтар

Азаматтарға пайызсыз несие беріледі

09.04.2021

1 мин

39

19398

Нұр-Сұлтан қаласында үйлерді газдандыру бойынша жоба іске қосылды. Қала әкімдігі, Halyk Bank және «ECOJER» қауымдастығы өзара ынтымақтастық туралы келісімге қол қойды. Бұл туралы Нұр-Сұлтан қаласы әкімдігінің ресми сайты хабарлады.

Жоба аясында Halyk Bank арқылы баспананы газбен жабдықтау үшін процентсіз несие рәсімдеуге болады.

Азаматтардың экологиялық таза көгілдір отынға көшуін жеделдету үшін қаржылық мәселелерді қолға алу мақсатында аталмыш жоба қабылданды. Осы орайда, Halyk Bank «ECOJER» қауымдастығының ұсынысын қолдап, алғашқы жүз азаматқа процентсіз несие береді.

«Қазіргі кезде экология өзекті мәселелердің бірі. Әсіресе, еліміздің үлкен қалалары үшін қоршаған ортаны жақсартуды қолға алу керек. Өз кезегінде Halyk Bank аталмыш бастаманы қолдау мақсатында елорда тұрғын үйлерін газдандыру шарасына қолдау білдіреді. Еліміздің бас қаласының бизнес-қоғамдастығын біздің бастамамызды қолдауға шақырамыз», - деді Halyk Bank Басқарма төрайымы Үміт Шаяхметова.

Бағдарлама аясында азаматтар 750 000 теңгеге дейін пайызсыз қарыз рәсімдей алады.

Несиені қалай рәсімдеуге болады  

• кеңес алу, өлшеу мен құнын есептеу үшін жақын жердегі ұйымға ("Capital Construction 2020" ЖШС) хабарласу керек;
• газды қосу үшін "ҚазТрансГаз Аймақ" АҚ-дан техникалық шарттар алу керек;
• "ECOJER" қауымдастығының "Жасыл сертификатын" алу керек;
• дайын құжаттармен Halyk Bank-тің екі бөлімшесінің біріне пайызсыз несие алу үшін хабарласу керек (Жеңіс даңғылы, № 72 үй және Бейбітшілік көшесі, № 24 үй, № 4 т.е.ж.).

Қосымша ақпаратты halykbank.kz және ecojer.kz сайттарынан көруге болады.