Жаңалықтар

Бағаны көтергендерге ескерту жоқ: кәсіпкерлер қандай айыппұл төлейді?

03.04.2025

1 мин

0

182

Сурет: f-o-o-d.ru

Сауда және интеграция министрлігі әлеуметтік маңызы бар азық-түлік тауарларының бағасын негізсіз өсіргендерге қандай шара қолданылатынын мәлімдеді, – деп хабарлайды Dauletten.kz.

Министрлік өкілдерінің айтуынша, үкімет баға тұрақтылығын сақтау мақсатында жүйелі шараларды қолға алған. Солардың бірі – әлеуметтік маңызы бар азық-түлік тауарларына белгіленген сауда үстемесіне мемлекеттік бақылау жүргізу.

Заңдағы өзгерістер

2024 жылы Сауда және интеграция министрлігінің бастамасымен Әділет министрлігі Әкімшілік құқық бұзушылық туралы кодекске (ӘҚБтК) өзгерістер енгізу туралы заң жобасын ұсынды. Нәтижесінде, 204-4 бапқа түзетулер енгізіліп, олар 2025 жылғы 13 наурыздан бастап күшіне енді.

- Жаңа өзгерістерге сәйкес, әлеуметтік маңызы бар азық-түлік тауарларының сауда үстемесі 15%-дан асса, кәсіпкерлерге ескерту жасалмайды – бірден айыппұл салынады. Бұрын бірінші рет заң бұзғандарға тек ескерту берілетін, ал бір жыл ішінде қайталанса ғана айыппұл қарастырылған еді, – деп түсіндірді министрлік өкілдері.

Айыппұл мөлшері:

• Жеке кәсіпкерлер мен шағын бизнес – 5 АЕК (19 660 теңге);
• Орта бизнес – 35 АЕК (137 620 теңге);
• Ірі сауда желілері – 150 АЕК (589 800 теңге).

Егер бір жыл ішінде заң бұзушылық қайталанса, айыппұл мөлшері екі есеге өседі.

- Бұл өзгерістердің басты мақсаты – әлеуметтік маңызы бар азық-түлік тауарларына бағаның негізсіз өсуіне жол бермеу. Қазіргі таңда сауда орындарына бақылау күшейтілді. Әр кәсіпкер белгіленген 15%-дық шекті сақтауы тиіс, – деп мәлімдеді министрлік.