Баспанаға бағыт

Балаңыз 18 жасқа толғанда жеке пәтері болады

06.06.2020

2 мин

209

16107

Әрбір ата-ана баласының баспаналы болуын қалайды. Осы тілекті ескеріп, Тұрғын үй құрылыс жинақ банкі «Арнау» балалар депозитін ашты.

Балаларды қорғау күнінде күшіне енген бағдарлама небәрі 2 пайыздық мөлшерлемемен пәтер алуға мүмкіндік береді. Бірақ депозитке қаражатты баланың кішкентай кезінен жинай бастаған жөн. Себебі, салымшы кем дегенде 10 жылдан 15 жылға дейінгі мерзімде пәтер бағасының 50%-ын жинауы қажет. Жинаған қаражатқа жыл сайын  20% (жыл ішінде жиналған 200 АЕК-ке (айлық есептік көрсеткішке) дейінгі жинақ сомасына) көлемінде мемлекет сыйақысы және жылдық 2% мөлшерінде банк сыйақысы беріледі.

«Арнау» депозитін баланың заңды өкілі (ата-анасы, қамқоршысы) ғана аша алады. Ал жинақтау мерзімі өткен соң жылдық мөлшерлемесі 2%-ды құрайтын тұрғын үй заемы кәмелет жасына жеткен баланың атына ғана рәсімделеді. Сондай-ақ депозиттегі шарт сомасының бағалау көрсеткіші 48-ге жетуі керек.

Ескеретін жайт, «Арнау» депозитін өзге депозитпен біріктіруге, басқаға табыстауға және аталған депозитке басқа тарифтік бағдарламалардан ауысуға болмайды.

Депозиттің қосымша артықшылықтары қандай?

• Салымшының төлем қабілетін растау әлдеқайда жеңілдетілген. «Арнау» депозитінің иесі табысы аз болған жағдайдың өзінде несие ала алады;
• Депозитті 18 жасқа дейінгі кез келген балаға ашуға болады. Мысалы, баланың жасы 15-те болса және оның атына депозит ашылса, 10 жылдан кейін, яғни 25-ке келгенде 2 пайызбен тұрғын үй несиесін рәсімдей алады.