Маман пікірі

Экономика қашан оңалады?

11.02.2021

1 мин

20

5352

Дүниежүзілік банк болжамдарына қарағанда Қазақстан экономикасының тез арада түзеліп кетуі қиын. Оған себеп – мемлекетіміздің шикізатқа тәуелдігі мен карантин салдары.   

Сондай-ақ ел экономикасына Қытай сияқты көршілес мемлекеттерден экспортқа сұраныстың азаюы да кесірін тигізеді. Өйткені мұнай бағасы тұрақсыз.

Мамандардың айтуынша, экономикаға ықпал ететін тағы бір фактор – аймақтас елдердің хал-ахуалы. Себебі Ресей мен Қытай сияқты серіктестердің белгілі бір жағдайларға байланысты біздің шикізатымызға сұранысының азаюы да экономикамызға кері әсер етері анық. Мысалы, Қытай бензин және дизельмен жүретін көліктерді шығаруды тоқтатуды жоспарлап отыр. Яғни Қазақстанның мұнай нарығына Қытайдың аталған автокөлік өндірісінен бас тартуы да әсер етуі мүмкін.

Сонымен қатар, көршілес елдің болашақта бізбен бәсекеге түсуі мүмкін мұнай қоры барын да ескеру керек. Зерттеушілердің болжамынша, пандемиядан кейінгі дағдарыс Қытайдың экономика саласын қайта қарастырып, өзгерістер енгізуіне себеп болады. Өйткені биыл ондағы бірқатар зауыттар дағдарыс кесірінен жабылды. Ол өз кезегінде Қазақстан экспортына теріс ықпал етті.

Осы орайда, энергоресурстар бойынша сарапшы Эльвира Айдарханова алдағы уақытта Қазақстан да экономикасына өзгеріс енгізуге мәжбүр болады деп есептейді. Осыған байланысты, төмендегідей шешу жолдарын ұсынады.

• Қазақстан мемлекеттік кіріс деңгейін ұстап тұру үшін экономикалық өсудің альтернативті жолдарының дамуына күш салуы керек.
• Дағдарыс кезінде шикізатты шетелдік инвестиция көмегімен қолдау нарықтық көрсеткіштерді құтқарғанымен, жаңа жұмыс орындарын ашуға септеспейді. Сондықтан үкімет инвестиция тарту жоспарын жаңартуы қажет.
• Қазақстан Орталық Азия елдерінің нарығын перспективалы нарық ретінде қарастырып, онда өз позициясын кеңейтуі керек.  

Жансая ҚАМБАР