Жаңалықтар

Елордада Орталық Азиядағы ең ірі ауыл шаруашылық көрмелері басталды

22.10.2024

мин

0

281

Елордада Орталық Азиядағы ең ірі “KazAgro/KazFarm-2024” ауыл шаруашылық көрмелері басталды, - деп хабарлайды Dauletten.kz.

Бүгін Астанада 15-ші рет дәстүлі түрде өтетін Халықаралық аграрлық көрмелердің ашылу салтанаты өтті. Ауқымды іс-шараға Қазақстан Республикасы Премьер-министрінің кеңесшісі Ералы Тоғжанов, Парламент Мәжілісінің депутаты Серік Егізбаев, ауыл шаруашылығы вице-министрі Аманғали Бердалин, Германияның Қазақстандағы елшілігінің экономика бөлімінің басшысы Ульрих Кинне, Германияның Федералды азық-түлік және ауыл шаруашылығы министрлігінің бөлім басшысы Йенс Урбан қатысты.

- Бұл іс-шара еліміздің ауыл шаруашылығын дамытуда үлкен рөл атқаратынына сенімдімін. Осымен 15-ші рет ұйымдастырып жатқан Шолпан Қожабаевқа алғыс білдіремін! Биыл серіктес мемлекеттен 40 компания қатысып жатыр. Біз үшін бұл жай ғана көрмелер емес, қатысушы елдермен өзара қарым – қатынасты нығайту мүмкіндігі, - деді Ералы Тоғжанова.

Көрмелерге әлемнің 20 елінен 250-ден астам үздік агроөнеркәсіптік кешен компаниясы қатысты, ал экспозициялар 20 мың шаршы метрді қамтып, бас қосуда агро саласының дамуына тиімді шешімдер ұсынды. Мысалы, Ростсельмаш компаниясы жаңартылған тракторлар, қуаты 330 а.к. және өнімділігі сағатына 120 тоннаға дейінгі RSM 2400, 6 – сыныпты әмбебап комбайн, жемшөп жинайтын комбайндарымен таныстырды.

- Биылғы жылы Германия өзінің үздік технологиялары мен халықаралық сарапшыларын әкелген серіктес ел болды. Бұл біздің көрмелеріміз бен жалпы еліміз үшін үлкен жетістік, өйткені Германия ауыл шаруашылығы көрмелерінің бүкіл тарихында екінші рет серіктес болды. Бұл Қазақстанның агроөнеркәсіптік секторындағы жаңа шыңдарды бағындыруға серпін беретініне сенімдімін, - деп атап өтті "ExpoGroup" ХКК компаниясының директоры әрі ұйымдастырушы Шолпан Қожабаева.

Естеріңізге сала кетейік, көрмелер 22-24 қазан аралығында Астана қаласы, Мәңгілік ел көшесі, 53/1 мекенжайы бойынша үш күн бойы жұмыс істейді. Кіру тегін.

Алдағы екі күн көрмелерде форумдар, сессиялардан бөлек, сауыншылар жарысы, қап-қап картоп пен ірі қара мал ойнатылады.