Жаңалықтар

Министр: Қазақстандықтардың несиені көп алуы – табысының жоғары екенін көрсетеді

25.06.2025

1 мин

6

370

Үкіметте өткен брифинг барысында Ұлттық экономика министрі Серік Жұманғарин елімізде несиелендіру көлемінің күрт өсуіне қатысты пікір білдірді. Оның айтуынша, тұтынушылық несиелер санының артуы халықтың жағдайының нашарлағанын білдірмейді, - деп хабарлайды Dauletten.kz.

2024 жылдың қорытындысы бойынша елдегі жалпы несие көлемі 20,9%-ға артып, 34 триллион теңгеге жуықтаған.
Атап айтқанда:

• Бизнестің несие алу көлемі 16%-ға өсіп, 13 триллион теңгені құрады;
• Халықтың жалпы несиесі 24%-ға артып, 21 триллион теңгеге жетті;
• Тұтынушылық несиелер 33,5%-ға өсіп, 14 триллион теңгеге дейін жеткен.

БАҚ өкілдері министрден "Несие алушылар санының артуы кедейліктің белгісі емес пе?" деп сұрады. Алайда министр бұл пікірмен келіспейтінін айтты.

- Тұтынушылық несиелердің артуы – халықтың өмір сүру деңгейінің көрсеткіші. Бұл – адамдардың мүмкіндігінің артқанын білдіреді. Олар несиені еш алаңсыз ала алады, – деді Жұманғарин.

Министрдің айтуынша, Қазақстанда азаматтардың мүддесін қорғауға бағытталған арнайы тетіктер қарастырылған. Мәселен, несие рәсімдемес бұрын азаматтарға шешімін қайта қарау үшін «бір түн ойлану» мүмкіндігі беріледі. Сонымен қатар, қарыз жүктемесі коэффициенті қолданылып, адамның барлық несиелері табысымен салыстырылып есептеледі. Қазіргі талап бойынша, бұл көрсеткіш жалақының 50%-ынан аспауы тиіс.

- Біз бұл шекті көрсеткішті 35%-ға дейін төмендетуді ұсынып отырмыз, – деп мәлімдеді министр.

Сөз соңында Жұманғарин қазақстандықтардың қаржылық жауапкершілігіне сенетінін айтты.

- Яғни, егер азамат көп несие алса, бұл – оның табысы жоғары, қаржылық мүмкіндігін бағамдай алатын адам екенін көрсетеді. Ал егер ол ірі сома алса, табысы да соған сәйкес болуы мүмкін. Бірақ егер азамат дәрі-дәрмек алу үшін несие рәсімдесе, онда бұл мәселені тереңірек талдау керек, – деді ол.