Жаңалықтар

Қараша айында кімдерге ең жоғары жалақы ұсынылды?

12.12.2024

1 мин

21

3419

Сурет: pinterest.com

Еңбек және халықты әлеуметтік қорғау министрлігі қараша айында Электрондық еңбек биржасындағы ең жоғары жалақы ұсынылған бос жұмыс орындарын атады, - деп хабарлайды Dauletten.kz.

Жұмыс берушілер ең жоғары жалақыны бас құрылысшыларға (орташа есеппен 726 мың теңгеден бастап), өндіруші өнеркәсіп саласының қызмет басшыларына (шамамен 649 мың теңге) және диірменшілерге (шамамен 580 мың теңге) ұсынған.

- Жұмыс іздеушілер арасында ең жоғары жалақыны әзірлеу жобаларының басшылары (орташа 1,3 миллион теңгеден бастап), талдау қызметінің басшылары (шамамен 1,2 миллион теңге) және ұшқыштар (шамамен 1,1 миллион теңге) талап еткен, - делінген хабарламада.

2024 жылдың қарашасында Электрондық еңбек биржасында (ЭЕБ) 96,9 мың бос жұмыс орны мен 91,7 мың түйіндеме жарияланған. Бұл жұмыс берушілер мен жұмыс іздеушілер белсенділігінің төмендеуін көрсетеді. Қазан айымен салыстырғанда бос жұмыс орындарының саны 22 пайызға (26,7 мыңға), ал түйіндемелер саны 14 пайызға (14,3 мыңға) қысқарған.

- Сұраныстың айтарлықтай төмендеуі негізінен жылу беру саласындағы жұмысшылар қажеттілігінің азаюымен байланысты. Қазандық операторларына сұраныс қазан айындағы 7 мыңнан қарашада 500-ге дейін, қазандық машинистеріне – 2,3 мыңнан 408-ге дейін, ал от жағушыларға – 6,3 мыңнан 805-ке дейін күрт төмендеді, - делінген хабарламада.