Жаңалықтар

Қазақстанда шетелдік спортшыларды бюджет есебінен қаржыландыруға тыйым салынады

27.03.2025

1 мин

0

254

Сурет: ekip-sport.tu

Қазақстанда шетелдік спортшыларды мемлекеттік бюджет есебінен қаржыландыруға тыйым салынды. Бұл туралы Сенат қабылдаған жаңа заңға сәйкес белгілі болды, - деп хабарлайды Dauletten.kz.

Жаңа заң “Қазақстан Республикасының кейбір заңнамалық актілеріне дене шынықтыру және спорт, сондай-ақ артық заңнамалық регламенттеуді болдырмау мәселелері бойынша өзгерістер мен толықтырулар енгізу туралы” деп аталады.

Сенатор Әсем Рахметованың айтуынша, құжат спорт саласындағы заңнаманы жетілдіру және әкімшілік реформаның екінші кезеңін жүзеге асыру мақсатында әзірленген. Ол орталық және жергілікті атқарушы органдар арасындағы құзыреттерді нақты бөлуге бағытталған.

Заңға сәйкес келесі негізгі өзгерістер енгізілді:

• Олимпиада, Паралимпиада, Сурдлимпиада, Азия және Пара Азия ойындарындағы ұлттық құрамалардың нәтижелеріне сүйене отырып, басым спорт түрлерін анықтау;
• Республикалық және өңірлік спорт федерацияларын ұлттық спорт федерацияларына айналдыру;
• Жоғары жетістіктер спортына жататын басым спорт түрлерін бірінші кезекте қаржыландыру;
• Командалық спорт түрлеріне арналған кәсіби клубтарды ұстауға шектеулер енгізу;
• Қазақстан азаматтығы жоқ спортшыларды мемлекеттік бюджет есебінен қаржыландыруға тыйым салу;
• Спорт федерацияларын аккредиттеу талаптарын бекіту;
• Спорт федерацияларына діни экстремизм мен терроризмнің алдын алу шараларын қабылдау міндетін жүктеу;
• Бірыңғай оператордың қаржысын спорттық инфрақұрылым нысандарын салуға пайдалану мүмкіндігін қарастыру;
• Уәкілетті органдардың спорт ұйымдарының басшыларын ротациялау ережесін енгізу.

Сонымен қатар, халықаралық жарыстарға қатысатын бірінші топтағы мүмкіндігі шектеулі спортшыларды алып жүретін адамдардың шығындарын өтеу заңнамалық түрде бекітілді. Сондай-ақ спорттық медицинаны дамытуға бағытталған шаралар қабылданды.

Спортшыларға мамандандырылған медициналық көмек көрсету және спорттық медицина мен оңалту саласында заманауи технологияларды енгізу мақсатында ұлттық спорттық медицина және оңалту ұйымын мемлекеттік кәсіпорын ретінде құру ұсынылды.

Мемлекеттік әлеуметтік қолдау көрсету тәртібіне де өзгерістер енгізіліп, бұл Олимпиада, Паралимпиада, Сурдлимпиада ойындарының чемпиондары мен жүлдегерлерін, сондай-ақ әлем чемпиондарын және олардың жаттықтырушыларын қамтитыны нақтыланды.

Сонымен қатар, заң аясында орталық және жергілікті атқарушы органдар арасындағы құзыреттерді ажыратуға қатысты түзетулер енгізілді.