|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Соңғы үш жылда Қазақстанның екінші нарығында пәтер құны шамамен 40%-ға өскен. Бұл туралы 2021-2024 жылдар аралығындағы ұсыныстарға талдау жасаған Krisha.kz сарапшылары мәлімдеді. Қорытынды бойынша бағаның барлық өңірде өскені байқалады.
Мұндай қымбатшылыққа сұраныстың артуы, зейнетақы қорынан ақша алуға рұқсат беру, доллар бағамының өсуі, құрылыс материалдарының қымбаттауы мен 2022 жылы құрылыс қарқынының бәсеңдеуі ықпал еткен.
Еске сала кетсек, 2021 жылы Қазақстан билігі зейнетақы қорынан шектік мөлшерге жеткен жағдайда ақша алуға рұқсат берген еді. Көріп отырғанымыздай, салдары үй бағасының шарықтауына әкеліп соқты. Бір жылда қазақстандықтар шамамен 2 500 000 000 000 теңге шешіп алған. Тұрғын үймен байланысты мәміле саны алдыңғы жылмен салыстырғанда екі есе, яғни 609 000-ға өскен. Екінші нарықта пәтер құны 27%-ға өссе, жаңа үйлер тіпті 40%-ға қымбаттап үлгерген.
2022 жылы билік қордан алуға рұқсат берілген соманы 70% арттырғандықтан, зейнетақы қорына жүгінген, үй іздеген халықтың қарасы азайып қалды. Алайда құрылыс материалдары мен жұмыс ақысы көтеріліп, баспана құны да шарықтай берді. Бір жылда мүлік иелері қолдан сатқан пәтерлердің орташа бағасы тағы 10%-ға өскен.
2023 жылдың І тоқсанында тұрғын үй бағасы аздап көтерілгенмен, жаз аяғына қарай қайта түсті, ал күзде мүлде тоқтап қалды, қыс мезгілінде де аса өзгеріс байқалмады. Бір жылда небәрі 1.1%-ға ауытқыған.
