|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Мәжіліс депутаттары білім және мәдениет мәселелеріне қатысты заң жобасына түзетулер әзірледі. Бұл өзгерістер халықаралық ғылыми жобалар байқауының жүлдегерлеріне біржолғы төлем беру, кейбір жоғары оқу орны түлектерін грант өтеу міндетінен босату және басқалары үшін оны кейінге шегеру мәселелерін қамтиды. Жаңа заңнамалық нормалар туралы Мәжіліс депутаты Асхат Аймағамбетов мәлімдеді, - деп хабарлайды Dauletten.kz.
Қазақстанда мемлекеттік грантпен білім алған түлектерге оны өтеу талабы бар. Алайда, бұл заң жобасы аясында депутаттар халықтың өтінішін ескеріп, ата-ана атанған немесе мүгедектігі бар балаларды тәрбиелеп отырған түлектерді бұл міндеттен босатуды ұсынды. Аймағамбетовтің айтуынша, бұл бастаманы Ғылым және жоғары білім министрлігі қолдаған.
- Мүгедектігі бар балаларды тәрбиелеп отырған түлектер аз емес. Олардың жағдайын ескере отырып, мемлекет оларға қолдау көрсетуі керек. Біз бұл бастаманы көтердік, Үкімет те қолдады. Егер мемлекеттік грант бойынша оқыған түлектің мүгедектігі бар баласы болса, ол грантты өтеуден босатылады, – деді депутат.
Сонымен қатар, I топтағы мүгедектігі бар азаматтарға күтім жасайтын қазақстандықтарды да бұл міндеттен босату ұсынылып отыр.
Депутат сондай-ақ шетелдік жоғары оқу орындарының резидентура, магистратура, аспирантура, докторантура бағдарламаларына түсіп, оқуын аяқтаған түлектерге грантты өтеу мерзімін кейінге шегеруді ұсынды.
- Бакалавриатты аяқтап, шетелде магистратураға түскендер үшін де кейінге қалдыру мүмкіндігін енгізуді ұсындық. Егер ол магистратурада екі жыл оқыса, грантты өтеу мерзімі де екі жылға шегеріледі, – деп түсіндірді Аймағамбетов.
Былтыр Президент Қасым-Жомарт Тоқаев дарынды балаларды қолдау және дамыту қажеттігін атап өтті. Осыған байланысты Мәжіліс депутаттары халықаралық ғылыми жоба байқауларының жеңімпаздарына бір реттік төлем қарастыруды ұсынды.
Бұл байқаулардың жеңімпаздарына ең жоғары төлем мөлшері – шамамен 6 миллион теңге. Сонымен қатар, оларды дайындаған мұғалімдерді де ынталандыру көзделіп отыр.
- Спортта олимпиада чемпиондары 250 мың доллар көлемінде сыйақы алады. Халықаралық ғылыми жобалар мен пәндік олимпиадалардың жеңімпаздары да еліміз үшін маңызды. Бұл – бұған дейін қабылданған нормалардың логикалық жалғасы. Өткен жылы халықаралық ғылыми жобаларда жоғары нәтиже көрсеткен оқушыларға ҰБТ тапсырмай-ақ грантқа түсу және “Болашақ” стипендиясына үміткер болу мүмкіндігі берілді. Бүгінгі норма – осы бастаманың жалғасы, – деді Асхат Аймағамбетов.
