Жаңалықтар

Қазақстанның бірнеше өңірінде тұман түсіп, көктайғақ болады

16.03.2025

мин

0

465

"Қазгидромет" РМК 17 наурызда еліміздің бірнеше өңірінде дауылды ескерту жасады, - деп хабарлайды Dauletten.kz.

Павлодар облысында батыс пен солтүстікте тұман түсіп, көктайғақ болуы мүмкін. Оңтүстіктен жел соғып, күндіз батыс пен оңтүстікте екпіні 15-20 м/с-қа жетеді. Павлодар қаласында да осы күні тұман мен көктайғақ күтіледі.

Маңғыстау облысының батысы мен орталығында күндіз шаңды дауыл соғып, түнде және таңертең оңтүстігінде тұман байқалады. Жел оңтүстік-шығыстан және оңтүстіктен соғып, таңертең және күндіз батысы мен орталығында жылдамдығы 15-20 м/с-қа дейін күшейеді. Ақтау қаласында күндіз шаңды дауыл күтіліп, жел екпіні 15-20 м/с-қа жетеді.

Ақтөбе облысының шығысында түнде және таңертең тұман түсуі ықтимал. Жел оңтүстіктен және оңтүстік-шығыстан соғып, түнде солтүстікте, ал күндіз батыс пен солтүстікте екпіні 15-20 м/с-қа дейін күшейеді.

Солтүстік Қазақстан облысында түнде батыс пен солтүстікте жаңбыр мен қар аралас жауын-шашын күтіледі, ал күндіз негізінен жаңбыр жауады. Осы аймақтарда көктайғақ пен тұман болуы мүмкін. Жел оңтүстік-батыстан соғып, жылдамдығы 15-20 м/с, ал батыс, солтүстік және оңтүстікте екпіні 23-28 м/с-қа жетеді. Петропавл қаласында да жаңбыр жауып, тұман мен көктайғақ күтіледі. Желдің екпіні күндіз 23-28 м/с-қа дейін күшеюі ықтимал.

Шығыс Қазақстан облысының солтүстігінде түнде және таңертең тұман күтіледі. Өскемен қаласында да дәл осындай жағдай болжануда.

Батыс Қазақстан облысының батысы, солтүстігі және шығысында тұман түседі. Жел оңтүстік-батыстан солтүстік-шығысқа ауысып, күндіз жылдамдығы 15-20 м/с-қа дейін жетеді. Орал қаласында да тұман күтіліп, күндіз желдің екпіні 18 м/с болады.

Абай облысының солтүстігі мен орталығында шығыстан және оңтүстік-шығыстан соққан желдің жылдамдығы 15-20 м/с-қа, ал күндіз екпіні 25 м/с-қа дейін күшеюі мүмкін.

Атырау облысында түнде және таңертең батыс пен оңтүстікте тұман түседі. Жел оңтүстіктен және оңтүстік-батыстан соғып, батыс пен солтүстікте екпіні 15-20 м/с-қа жетеді.

Астана қаласында таңертең және күндіз жаңбыр жауып, түнде және таңертең көктайғақ күтіледі. Сондай-ақ тұман түседі. Жел оңтүстіктен және оңтүстік-батыстан соғып, екпіні 15-20 м/с болады.

Ақмола облысының батысы, солтүстігі және шығысында түнде жаңбыр мен қар аралас жауын-шашын жауып, күндіз жаңбыр жауады. Аталған аймақтарда тұман мен көктайғақ байқалады. Жел оңтүстіктен және оңтүстік-батыстан соғып, екпіні 25 м/с-қа дейін күшеюі мүмкін. Көкшетау қаласында күндіз жаңбыр жауып, көктайғақ күтіледі. Желдің екпіні 15-20 м/с болады.

Қостанай облысының солтүстік бөлігінде түнде жаңбыр мен қар аралас жауын-шашын күтіліп, көктайғақ болады. Күндіз осы аймақтарда жаңбыр жауады. Батыс, оңтүстік және шығыста тұман түсуі мүмкін. Жел оңтүстік-батыстан соғып, екпіні 15-20 м/с-қа дейін жетеді. Қостанай қаласында түнде жаңбыр мен қар аралас жауын-шашын жауып, көктайғақ күтіледі, ал күндіз жаңбыр жауады. Желдің жылдамдығы 15-20 м/с болады.

Қарағанды облысының батысы, солтүстігі және шығысында кей уақыттарда тұман түсіп, жолдарда көктайғақ болуы ықтимал. Жел оңтүстіктен және оңтүстік-шығыстан соғып, таңертең және күндіз батыс пен солтүстікте екпіні 15-18 м/с-қа жетеді.

Ұлытау облысының батысы, солтүстігі және шығысында кей уақыттарда тұман күтіледі.