Жаңалықтар

Қандастар мен Қазақстанға көшіп келушілер үшін ҚАЗТЕСТ қалай өтеді?

14.09.2026

мин

0

138

Сурет: azattyq-ruhy.kz

Қазақстанда тұрақты тұруды жоспарлаған шетел азаматтары мен қандастар үшін қазақ тілін білу деңгейін анықтайтын талап бар. ҚАЗТЕСТ онлайн өткізіледі, ал тесттен өте алмаған азаматтарға қайта тапсыруға мүмкіндік қарастырылған, — деп хабарлайды Dauletten.kz.

Қандас мәртебесін рәсімдеу немесе Қазақстанда тұрақты тұруға рұқсат алу кезінде азаматтың мемлекеттік тілдегі қарапайым ақпаратты қабылдай алуы ескеріледі. Осы мақсатта ҚАЗТЕСТ тапсырылады.

Бұл сынақ қазақ тілін жоғары деңгейде меңгергенін дәлелдеуге арналған емтихан емес. Негізгі назар адамның күнделікті өмірде кездесетін қазақша ақпаратты түсінуіне және қарапайым тілдесуге дайын екеніне аударылады.

Тест екі дағдыны қамтиды. Бірінші бөлімде қатысушы аудио арқылы берілген ақпаратты тыңдап, оның мазмұнын түсінуі керек. Екінші бөлімде мәтінді оқып, негізгі ой мен қажетті мәліметті анықтайды.

Жалпы 60 тапсырма беріледі. Оларды орындауға 70 минут уақыт қарастырылған. Тестілеу қашықтан, онлайн форматта ұйымдастырылады.

Алдын ала дайындалғысы келетін азаматтарға да жағдай жасалған. Бейімдеу және интеграция орталықтарында тестілеуге дайындық бойынша тегін көмек көрсетіледі. Мұнда қатысушылар сынақтың тәртібін біліп, үлгі тапсырмаларды орындап, мамандардан кеңес ала алады.

Бірінші талпыныста қажетті нәтижеге жете алмаған жағдайда тестілеу мүмкіндігі аяқталмайды. Азамат соңғы сынақтан кейінгі 30 күнтізбелік күн ішінде екі ретке дейін қайта тапсыра алады.

Онлайн емтихан кезінде қатысушының әрекеті прокторинг жүйесі арқылы бақыланады. Сондықтан тест басталғанға дейін интернет жылдамдығын, камера мен микрофонның жұмысын тексеріп алған жөн.

Тестілеу нәтижесі үш жұмыс күні ішінде дайын болады.

ҚАЗТЕСТ арқылы адамның кәсіби тілдік білімі емес, Қазақстандағы күнделікті өмірге қажет қазақ тілін түсіну және қарапайым деңгейде пайдалану қабілеті бағаланады.