Жаңалықтар

Қытаймен шекарада қомақты қаржымен ұсталған қазақстандыққа айыппұл салынды

25.02.2025

1 мин

0

320

Сурет: depositphotos

Қазақстандық азамат шекарадан миллиондаған ақшаны алып өтпек болған, - деп хабарлайды Dauletten.kz.

Жетісу облысының тұрғыны Қытайдан көлік сатып алу үшін валюта айырбастау пунктінен 47 300 АҚШ долларын сатып алған. Бұл қаражат “Нұр Жолы” өткізу бекетіндегі кедендік тексеру кезінде оның қол жүгінен табылған. Кеден заңнамасына сәйкес, жеке тұлғалар 10 000 АҚШ долларына дейінгі соманы ешбір декларациясыз алып өте алады. Ал одан асатын қаражат міндетті түрде жазбаша декларациялануы тиіс.

Панфилов аудандық соты құқық бұзушылыққа қатысты әкімшілік істі қарау барысында, азаматтың қаржының жартысы екі досына тиесілі деген уәжін растайтын дәлелдер ұсынбағанын ескеріп, бұл мәлімдемені есепке алмады.

Құқық бұзушының кінәсі:

• әкімшілік құқық бұзушылық туралы хаттамалар,
• кедендік тексеру хаттамалары,
• бейнежазбалар мен өзге де іс материалдарымен дәлелденді.

Сот азаматтың кінәсін мойындамауын жауапкершіліктен жалтару әрекеті ретінде бағалады. Сондай-ақ, ұсталған қаражатқа қатысты ешбір куәгер сотқа немесе басқа да мемлекеттік органдарға мүліктік шағым түсірмегені атап өтілді.

Құқық бұзушы ӘҚБтК-нің 551-бабының 3-бөлігі бойынша кінәлі деп танылып, оған:

• 37 300 АҚШ доллары мемлекет пайдасына тәркіленді,
• 4,5 миллион теңге айыппұл салынды.

Ал заңмен рұқсат етілген 10 000 АҚШ доллары өз иесіне қайтарылды.

Сот шешімі заңды күшіне енген жоқ.